დღეისათვის ნავთობის ფასმა ბოლო 9 თვის მაქსიმუმ მაჩვენებელს მიაღწია, - ამის შესახებ ნავთობპროდუქტების იმპორტიორთა კავშირის თავმჯდომარემ ვანო მთვრალაშვილმა განაცხადა. მისი თქმით, 2012 წლის 21 თებერვლის ვაჭრობის შედეგებით მსოფლიოს წამყვან ლონდონისა და ნიუ-იორკის სანავთობო ბირჟებზე ნავთობის ფასმა შეადგინა: ლონდონში InterContinental Exchange Futures Europe-ზე (IСE Futures Europe) - Brent ტიპის ნავთობის ფასმა - 121.66 დოლარი/ბარელზე, ხოლო ნიუ-იორკშიYork Mercantile Exchange-ზე (NYMEX) - Light Sweet ტიპის ნავთობის ფასმა - 105.84 დოლარი / ბარელზე.
"ნავთობის ფასის ზრდა განპირობებულია ირანის გარშემო შექმნილი ვითარების გამო. კერძოდ, როგორც ცნობილია, ევრო კავშირის მიერ მიღებულ იქნა გადაწყვეტილება ირანულ ნავთობზე ემბარგოს დაწესებასთან დაკავშირებით. აღნიშნული გადაწყვეტილებები ამოქმედდება მიმდინარე წლის 1 ივლისიდან.თუმცა ირანმა გადადგა საპასუხო ნაბიჯი. მან ამ ეტაპზე ნავთობის მიწოდება შეუწყვიტა საფრანგეთსა და დიდ ბრიტანეთს და იმუქრება იგივეს გაკეთებას ევრო კავშირის სხვა ქვეყნების მიმართაც", - აღნიშნა მთვრალაშვილმა.
მისივე თქმით, მნიშვნელოვნადაა ასევე გაზრდილი საერთაშორისო ფასები ნავთობპროდუქტებზე Platt's-ის მიხედვით, რომლის მიხედვითაც ხორციელდება საქართველოში საწვავის იმპორტი.
"2012 წლის 20 თებერვლის მდგომარეობით ბენზინის ფასი შეადგენს 1075 დოლარს/ტონაზე, ხოლო დიზელის - 1010 დოლარს/ტონაზე. უნდა აღინიშნოს, რომ მიმდინარე წლის დასაწყისში, კერძოდ 4 იანვარს ბენზინის საერთაშორისო ფასი შეადგენდა 961,00 დოლარს/ტონაზე, ხოლო დიზელის - 952 დოლარს/ტონაზე", - განაცხადა ნავთობპროდუქტების იმპორტიორთა კავშირის თავმჯდომარემ.