თბილისის მერი გიგი უგულავა ავჭალაში მცხოვრებ მდინარაძეების ოჯახს ესტუმრა და ელექტროენერგიის 20 ლარიანი ვაუჩერი პირადად გადასცა.
უგულავას თქმით, თბილისში ელექტროენერგიის მომხმარებელი 350 000-ზე მეტი აბონენტი ფიქსირდება და თითოეული მათგანი კუთვნილს ვაუჩერს უახლოეს დღეებში მიიღებს.
საქართველოს პრეზიდენტის მიხეილ სააკაშვილის ინიციატივით, მიმდინარე წელს არსებული რთული მეტეოროლოგიური პირობებიდან გამომდინარე, საქართველოში მცხოვრებ ყველა ოჯახს, ერთჯერადად, ელექტროენერგიის 20 ლარიანი ვაუჩერი დაურიგდება.
ვაუჩერების დარიგება ეტაპობრივად განხორციელდება. პროცესი 21 თებერვლს დაიწყება და 31 მარტს დასრულდება. დღეიდან ამოქმედდა ცხელი ხაზი: 251-00-33, სადაც ნებისმიერ დაინტერესებულ პირს შესაძლებლობა ექნება ვაუჩერიზაციასთან დაკავშირებით, ამომწურავი ინფორმაცია მიიღოს.
ვაუჩერების დარიგება დღეს თბილისიდან დაიწყო.
