პოლიტიკური პარტია "დემოკრატიული მოძრაობა" "თავისუფალი დემოკრატების" მხარდამჭერების დაკავების ფაქტს ეხმიანება. როგორც "დემოკრატიული მოძრაობიდან" "ჯი-ეიჩ-ენს" აცნობეს, აღნიშნული დაპატიმრება ხელისუფლების „პოლიტიკური პოლიციის" თანამშრომლების ინსპირირებულია.
"ბუნებრივია ჩვენთვის უცნობია აღნიშნული ინციდენტის დეტალები,მაგრამ გამომდინარე იმ მწარე გამოცდილებიდან, რომელიც „დემოკრატიულმა მოძრაობამ" დაარსების დღიდან მიიღო ხელისუფლებასთან ბრძოლის გზაზე, დიდი ალბათობით აღნიშნული დაპატიმრება ხელისუფლების „პოლიტიკური პოლიციის" თანამშრომლების ინსპირირებულია. „დემოკრატიული მოძრაობა" თანადგომას უცხადებს და გამძლეობას უსურვებს „თავისუფალი დემოკრატების" დაპატიმრებულ აქტივისტებს და მათი ოჯახების წევრებს და კიდევ ერთხელ ხაზგასმით აღნიშნავს, თუ რამდენად მნიშვნელოვანია ყველა ოპოზიციური პარტიის მხრიდან პოლიტპატიმრებისათვის სოლიდარობისა და მხარდაჭერის გამოხატვა, რომელიც ასე გვაკლია, იმისათვის, რომ ხელისუფლებამ არ განახორციელოს ზეწოლა და ტერორი ჩვენს მოქალაქეებზე მათი პოლიტიკური შეხედულებების გამო", - აღნიშნულია განცხადებაში.
განცხადების თანახმად, „დემოკრატიული მოძრაობა" იმედს გამოთქვამს, რომ უფლებადაცვითი ორგანიზაციები რეაგირების გარეშე არ დატოვებენ აღნიშნულ ფაქტს.
"ჩვენ არ გვაქვს ილუზია, რომ ხელისუფლება ობიექტურ გამოიძიებას ჩაატარებს, ვინაიდან ჩვენი მომხრეების წინააღმდეგ წარმართულ ათობით და ასობით ფაქტზე დაყრდნობით ვიცით, თუ რა ტერორისა და ზეწოლის ქვეშ შეიძლება ამყოფოს ხელისუფლებამ დაპატიმრებულები და მათი ოჯახის წევრები, რომ მოიპოვოს მისთვის სასურველი აღიარებითი ცრუ ჩვენებები. "დემოკრატიული მოძრაობა" მიიჩნევს, რომ მიუხედავად პოლიტიკური ლიდერებისა და პოლიტიკური ძალების იდეოლოგიური თუ პოლიტიკური შეხედულებების, რეალური თუ მოგონილი განსხვავებებისა, არც ერთი ასეთი ფაქტი, არც ერთი პოლიტპატიმარი თუ ხელისუფლების მხრიდან დატერორებული ჩვენი მოქალაქე არ უნდა იყოს დატოვებული საერთო ოპოზიციური სპექტრის ერთსულოვანი რეაგირების, თანადგომისა და მხარდაჭერის გარეშე", - აღნიშნულია განცხადებაში.
"თავისუფალი დემოკრატების" მხარდამჭერები ელგუჯა მახარაშვილი, აკაკი ელიაშვილი და ჯაბა ელიაშვილი სამხედრო პოლიციელთან მომხდარი ინციდენტის შემდეგ, რომელიც სიტყვიერ და ფიზიკურ დაპირისპირებაში გადაიზარდა, დღეს დილით დააკავეს. აღსანიშნავია, რომ ელგუჯა მახარაშვილის მამის, გოდერძი მახარაშვილის განცხადებით, რომელიც "თავისუფალი დემოკრატების" წევრია, მას ემუქრებოდნენ რომ შეეწყვიტა პოლიტიკური საქმიანობა.