ბათუმის მერიაში ადასტურებენ, რომ მეორე მსოფლიო ომში დაღუპულთა მემორიალის დემონტაჟის პროცესი დაწყებულია. როგორც "ჯი-ეიჩ-ენს" მერიაში განუცხადეს, მემორიალის ტერიტორია დემონტაჟის დასაწყებად გუშინ შემოისაზღვრა, თუმცა ამ დროისთვის მისი დემონტაჟი არ განხორციელებულა.
ბათუმის მერიის ინფორმაციით, აღნიშნული მემორიალის დემონტაჟის ინიციატივით აჭარის ეკონომიკის სამინისტრომ მიმართა ბათუმის საკრებულოს, რომელმაც დემონტაჟზე დადგენილება მიიღო და აღსრულება მერიას დაავალა. მემორიალი კომპანია "არგოს" პროექტში მოხვდა, რომელიც ბათუმის მთიდან ქალაქის მიმართულებით საბაგირო გზის გაყვანას იწყებს. საბაგირო გზამ მოიცვა მემორიალიც, რის გამოც მისი დემონტაჟი გადაწყდა.
შეგახსენებთ, რომ "დემოკრატიულმა მოძრაობამ" დღეს განცხადება გაავრცელა, რომლის მიხედვითაც, საქართველოს პრეზიდენტი მიხეილ სააკაშვილი ბათუმში მეორე მსოფლიო ომის დროს დაღუპული ჯარისკაცების ხსოვნის მემორიალის დემონტაჟს ახორციელებდა.
