ივანე ჯავახიშვილის სახელობის თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის ჟურნალისტიკის და მასობრივი კომუნიკაციის მიმართულების სტუდენტები სტაჟირებას საზოგადოებრივ მაუწყებელში გაივლიან.
თანამშრომლობის შესახებ მემორანდუმი თსუ რექტორმა ალექსანდრე კვიტაშვილმა და საზოგადოებრივი მაუწყებლოს გენერალურმა დირექტორმა გიორგი ჭანტურიამ დღეს თბილისის სახელმწიფო უნივერსიტეტში გააფორმეს.
მემორანდუმის თანახმად, ბაკალავრიატის დამამთავრებელი კურსის საუკეთესო აკადემიური მოსწრების 20-მდე სტუდენტი საზოგადოებრივ მაუწყებელში ერთთვიან პრაქტიკას სამ ნაკადად გაივლის. სტაჟირების გავლის შემდეგ სტუდენტები სასწავლო კრედიტს მიიღებენ.
თსუ რექტორის ალექსანდრე კვიტაშვილის განცხადებით, საზოგადოებრივ მაუწყებელთან მემორანდუმის გაფორმება მნიშვნელოვანია უნივერსიტეტისთვის და სტუდენტებისთვის. "ეს იქნება სტაჟირების კურსი საზოგადოებრივი მაუწყებლის სტუდიებში, სადაც სტუდენტები მიღეებენ პრაქტიკულ გამოცდილებას. ასევე გვინდა გავაკეთოთ უნივერსიტეტის ტელევიზია, სადაც სტუდენტები დასაქმდებიან".
როგორც საზოგადოებრივი მაუწყებლის გენერალურმა დირექტორმა გიორგი ჭანტურიამ განაცხადა, ევროპული სტანდარტების ტექნოლოგიებისა და სწავლების ახალი მეთოდების საფუძველზე, სტუდენტები საზოგადოებრივ მაუწყებელში დიდი გამოცდილების მიღებას შეძლებენ. "ინიციატივა უნივერსიტეტს ეკუთვნის და მოხარული ვარ, რომ თანამშრომლობა შედგა. ეს თანხვედრა მნიშვნელოვანია არა მხოლოდ ჩვენთვის და თსუ-ის სტუდენტებისთვის, არამედ მთელი ქვეყნისათვის. მოხარული ვიქნებით თუ ჩავერთვებით საუნივერსიტეტო ტელევიზიის პროექტშიც და ერთობლივი მუშაობით წარმატებას მივაღწევთ. ამ თანამშრომლობის ფარგლებში მომზადებული სტუდენტები მომავალში ჩვენთვისაც საინტერესო კადრები იქნება".
