ქვეყნის მასშტაბით, თვის ბოლომდე კვლავ არამდგრადი ამინდი იქნება. როგორც ""ჯი-ეიჩ-ენს" გარემოს ეროვნული სააგენტოს მონიტორინგისა და პროგნოზირების ეროვნულ ცენტრში განუცხადეს, 18 თებერვლიდან ორი დღის განმავლობაში ქვეყნის უმეტეს რაიონებში თოვლის სახით კვლავ ნალექია მოსალოდნელი. მაღალმთაში მოსალოდნელია ქარბუქი.
20-21 თებერვალს ისევ გამოიდარებს, თუმცა თვის ბოლომდე კვლავ არამდგრადი ამინდი იქნება.
თბილისში დღეს თოვაა მოსალოდნელი. იქროლებს ჩრდილო დასავლეთის ქარი 10-15 მეტრი წამში, დროგამოშვებით _ 17-22 მეტრი წამში. დასავლეთ საქართველოში ნალექი უმეტესად წვიმის სახით იქნება, თუმცა მთაში მოთოვს. საქართველოს აღმოსავლეთით ყინვებია მოსალოდნელი. ჰაერის ტემპერატურა ღამით -9 გრადუსამდე დაეცემა.
