დღეს, 16 თებერვალს, შემოსავლებზე და კაპიტალზე ორმაგი დაბეგვრის თავიდან აცილების შესახებ უნგრეთთან შეთანხმება გაფორმდება. საქართველოს დელეგაცია პრემიერ-მინისტრ ნიკოლოზ გილაურის მეთაურობით უნგრეთში უკვე გაემგზავრა. გილაურთან ერთად უნგრეთში გაემგზავრა და მასთან ერთად ბუდაპეშტში გამართულ შეხვედრებს დაესწრება ფინანსთა მინისტრი დიმიტრი გვინდაძე.
ვიზიტის ფარგლებში, 16 თებერვალს, უნგრეთის ეკონომიკის სამინისტროში გვინდაძე და უნგრეთის ეროვნული ეკონომიკის მინისტრი გიორგი მატოლჩი ხელს მოაწერენ "საქართველოსა და უნგრეთის მთავრობას შორის შემოსავლებსა და კაპიტალზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ შეთანხმებას". შეთანხმების მთავარი მიზანია, ხელი შეუწყოს ქვეყნებს შორის ეკონომიკური თანამშრომლობის გაღრმავებასა და ინვესტიციების მოზიდვას.
უნგრეთი საქართველოს ერთ-ერთი მნიშვნელოვანი სავაჭრო პარტნიორია. 2008-2011 წლებში ორ ქვეყანას შორის სავაჭრო ბრუნვამ შეადგინა 125 188 600 აშშ დოლარი. საქართველოში ინვესტიციების წახალიება საქართველოს მთავრობის 10-პუნქტიანი გეგმის ერთ-ერთი მთავარი პრიორიტეტია. ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ შეთანხმებით, იქმნება აუცილებელი პირობები, საქართველოში კერძო ინვესტიციების დაბანდების ხელშეწყობის მიზნით. ამჟამად, ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ შეთანხმება ძალაშია 36 ქვეყანასთან.