დევნილებს ელექტროენერგიაზე შეღავათები მხოლოდ გამრიცხველიანების შემდეგ მოეხსნათ. ამის შესახებ პარლამენტის პლენარულ სხდომაზე ადამიანის უფლებათა დაცვის კომიტეტის თავმჯდომარემ ლაშა თორდიამ "ქრისტიან-დემოკრატების" საპასუხოდ განაცხადა.
"ამ ადამიანებს პირდაპირ გადაეცემათ ეს თანხები, ანუ 22-ლარიანი შემწეობა, რომელიც ჰქონდათ მათ დანიშნული, გახდა 28 ლარი, რაც აქამდეც ჰქონდათ კერძო სექტორში მყოფ დევნილებს. მისასალმებელია ის ფაქტი, რომ ჩვენი კოლეგები ყურადღებას ამახვილებენ
დევნილების საკითხებზე, მაგრამ პრობლემები, რომლებიც დაასახელეს, თითქოს მოხდა იმ დახმარების გაუქმება, რომელსაც სახელმწიფო ახორციელებდა ელექტროენერგიასთან დაკავშირებით, ასე ზედაპირულად წარმოჩენა, შეგიყვანთ შეცდომაში თქვენ, შემდეგ შეიყვანს საზოგადოებას და შეცდომაში შეიყვანს დევნილებს", - განაცხადა თორდიამ.
მისი თქმით, სახელმწიფო ყველაფერს აკეთებს იმისთვის, რომ ასობით ათასობით დევნილს ჰქონდეთ ნორმალური საცხოვრებელი პირობები, სამუშაო ადგილი ჰქონდეს, რათა საზოგადოების სრულფასოვანი წევრები იყვნენ, სანამ ისინი საკუთარ სახლებში არ დაუბრუნდებიან.
