სამოქალაქო მოძრაობა "სოლიდარობა უკანონო პატიმრებს", "პატიმართა უფლებების დაცვის საქველმოქმედო ფონდი" და "სამოქალაქო და პოლიტიკური უფლებების ასოციაცია" სოლიდარობას უცხადებს საქართველოს არასამთავრობო და მედიაორგანიზაციების მიერ გავრცელებულ პეტიციას.
როგორც "ჯი-ეიჩ-ენს" მოძრაობიდან "სოლიდარობა უკანონო პატიმრებს" აცნობეს, აღნიშნული ორგანიზაციები კატეგორიულად მიუღებლად მიიჩნევენ 2011 წლის დეკემბერში მიღებულ საკანონმდებლო ცვლილებებს.
"ცვლილებები ზღუდავს სამოქალაქო აქტივობას, საკუთრების უფლებას, გამოხატვისა და პოლიტიკური საქმიანობის თავისუფლებას, აფერხებს ქვეყნის დემოკრატიულ განვითარებას; მძიმე და გაუმართლებელ პასუხისმგებლობას აკისრებს ამომრჩეველს; განუსაზღვრელ და არაკონსტიტუციურ უფლებამოსილებებს ანიჭებს პარტიების დაფინანსების მთავარ მაკონტროლებელს - საქართველოს კონტროლის პალატას; სერიოზულ საფრთხეებს უქმნის როგორც თითოეულ მოქალაქეს, ისე სამოქალაქო საზოგადოებას, მათ შორის, მედიას; აუარესებს საარჩევნო გარემოს ქვეყანაში. ეს არასამთავრობო ორგანიზაციებზე პირდაპირი ზეწოლაა", - აღნიშნულა განცხადებაში.
განცხადების თანახმად, აუცილებელია ამ ცვლილებების გასაჩივრება საკონსტიტუციო სასამართლოში, რაც აუცილებლად მოხდება და ჩვენ უნდა მივაღწიოთ ამ ანტიკონსტიტუციური საკანონმდებლო ცვლილებების გაუქმებას.
