ფრაქცია "ქრისტიან-დემოკრატების" თავმჯდომარემ გიორგი ახვლედიანმა პარლამენტის პლენარულ სხდომაზე დევნილებისთვის ელექტროენერგიის შეღავათის გაუქმება გააპროტესტა.
მისი შეფასებით, თავად ხელისუფლების გადაწყვეტილებებში დასტურდება, რომ ელექტროენერგიაზე ტარიფი უსაფუძვლოდ არის გაზრდილი და ისედაც ყველაზე მძიმე მდგომარეობაში მყოფი დევნილები ფიზიკური განადგურების პირას არიან მისულნი.
"დევნილებს ხელისუფლებამ გაუუქმა ყევლაზე რეალური და ხელშესახები დახმარება - ერთ სულზე 100 კილოვატი ელექტროენერგიის შეღავათი, რასად დევნილები ძირითადად ზამთარში მოიხმარდნენ ხოლმე. იმ ახალ ჩასახლებებში, რომლებიც დიდი ზარზეიმით იხსნება და ამაყობთ, ადამიანებს გათბობის ელემენტარული პირობებიც არ აქვთ", - განაცხადა ახვლედიანმა.
მისივე Dშეფასებით, არ არის გამორიცხული, რომ ხელისუფლების მსგავსი ნაბიჯები სოციალური აფეთქების მიზეზიც გახდეს.
"ხელისუფლებამ საინტერესო მიდგომა გამოიჩინა, როდესაც თქვა, რომ საკომპენსაციოდ 22 ლარის ნაცვლად დახმარებას დევნილებს, 28 ლარს მისცემს. 6 ლარი ვერ იქნება 17 ლარის თანაზომიერი კომპენსაცია, რადგან 100 კილოვატი ელექტროენერგია დევნილებს არა 6 არამედ, 17 ლარი დაუჯდებათ", - აცხადებს ახვლედიანი და აქვე დასძინა, რომ კიდევ ერთხელ დასტურდება "ქრისტიან-დემოკრატების" ლოზუნგის ნამდვილობა, რადგან ირკვევა რომ სახელმწიფო 100 კილოვატ ელექტროენერგიას თურმე 6 ლარად ყიდულობდა და არა 17 ლარად, რაც მოქალაქეებს უჯდებათ.
