ახალციხის მე-5 საჯარო სკოლაში ულტრათანამედროვე ტექნიკით აღჭურვილი საკლასო ოთახი გაიხსნა. საკლასო ოთახი დღეს პრეზიდენტმა დაათვალიერა. კლასში დამონტაჟებულია ინტერაქტიული დაფა და სენსორული მონიტორები. "მომავლის კლასში" მასწავლებლებს საშუალება აქვთ, თანამედროვე ტექნიკის მეშვეობით ადევნონ თვალყური მოსწავლეებს. ეს უკვე მეოთხე მომავლის სახლია საქართველოში. მიხეილ სააკაშვილი პედაგოგებს და მოსწავლეებსაც გაესაუბრა.
"რაც არ უნდა გაჭირვებულ ოჯახში ცხოვრობდეს ბავშვი, ასეთ სკოლაში რომ წავა, სულ სხვა განწყობით დაბრუნდება სახლში. საავადმყოფოები და სკოლები ჩემთვის კავშირშია ერთმანეთთან. როგორც საავადმყოფოში რომ მოხვდება, მერე სახლში სხვა ფსიქოლოგიით ბრუნდება, თითქოს ხუთვარსკვლავიან სასტუმროში იყო. ასეთ სკოლაში რომ ისწავლის და მერე კომპიუტერით წავა სახლში, არასდროს მოუნდება, დარჩეს სიღარიბეში. სიღარიბის გადალახვის შეიძლება გრძელი, მაგრამ ზუსტი გზა არის განათლების ასეთი სისტემა", - განაცხადა პრეზიდენტმა.
