აღნიშნულთან დაკავშირებით დღეს, ბესო ტაბატაძემ პრესკონფერენცია გამართა, რომლის შეფასებითაც სააკაშვილის ხელისუფლებას „დემოკრატიული მოძრაობისა" და „სახალხო კრების" ორმოცზე მეტი მხარდამჭერი აბსოლუტურად უკანონოდ, მხოლოდ პოლიტიკური ნიშნით ჰყავს დაპატიმრებული.
"ამ პოლიტპატიმრების საქმეებიდან 99%-ში, როგორც დაზარალებული ასვე მოწმე პოლიციელია. უკვე მეცხრე თვეა სააკაშვილის რეჟიმი ზეწოლას ანხორციელებს მათზე და მათი ოჯახის წევრებზე, რომ როგორმე მოიპოვოს მათი აღიარებითი ჩვენებები, მაგრამ ჩვენი მომხრეების აბსოლუტური უმრავლესობა უარს ამბობს აბსურდული ბრალდებების და არჩადენილი დანაშაულის აღიარებაზე", - აღნიშნა ტაბატაძემ.
მისივე თქმით, 6 თებერვალს გია სალუქვაძის სასამართლო პროცესი დასრულდა, რომელსაც 4 წლით თავისუფლების აღკვეთა სასამართლოზე მის მიერ წარმოთქმული სიტყვის გამო მიუსაჯეს.
ამასთან, ტაბატაძემ კიდევ ერთხელ აღნიშნა, რომ „დემოკრატიული მოძრაობისა" და „სახალხო კრების" ყველა მხარდამჭერი სააკაშვილის დანაშაულებრივი რეჟიმის წინააღმდეგ ბოლომდე იბრძლოებს.
"სწორედ ჩვენი პოლიტპატიმრებისა, ჩვენი უკანონოდ დაპატიმრებული ბიჭების, მათი ოჯახის წევრების გმირობის, შეუდრეკლობისა და გაუტეხლობის დამსახურებაა ის, რომ ხელისუფლებამ მრავალთვიანი ცილისწამებისა და შეკვეთილი სატელევიზიო პროპაგანდის მიუხედავად ვეღარ შეძლო ამაზრზენი ტყუილის ლეგალიზება „სახალხო კრების" უცხო ქვეყანასთან კავშირისა და სახელმწიფო გადატრიალების მცდელობის შესახებ", - აღნიშნა "დემოკრატიული მოძრაობის წევრმა.
მისივე შეფასებით, თუ საზოგადოება მოიკრივაბს ძალას, არ შეეგუება უსამართლობას და უკან არ დაიხევს მალე წარმატებით დასრულდება საქართველოსთვის ეს უმძიმესი პერიოდი.
