განახლებულ მწერალთა კავშირის შენობაში სასტუმრო, წიგნის მაღაზია, კაფე, საგამოფენო დარბაზი და სამუზეუმო ოთახი კეთდება. როგორც დიზაინერმა გუგა კოტეტიშვილმა "ჯი-ეიჩ-ენთან" განაცხადა, მწერალთა კავშირში ბევრი რამ იცვლება, მათ შორის ფუნქციაც.
"ეს აღარ იქნება მხოლოდ იმათი შენობა, ვინც მწერალთა კავშირშია გაწევრიანებული. ახალგაზრდა მწერლებს მიეცემათ საშუალება, მოაწყონ პრეზენტაციები და შემოქმედებითი საღამოები. ხოლო მათთვის, ვინც ამ კავშირშია გაწევრიანებული, მხოლოდ 2 ოთახი გამოიყოფა. შენობაში იქნება, ასევე, სასტუმრო მწერლებისთვის, სადაც დაისვენებენ ჩამოსული სტუმრები. განახლებულ
"მწერალთა სახლში" კეთდება კაფე, სამუზეუმო ოთახი, ბიბლიოთეკა და ა.შ.", - განაცხადა კოტეტიშვილმა.
როგორც "ჯი-ეიჩ-ენთან" საუბარში კოტეტიშვილმა აღნიშნა, შენობა წელიწად-ნახევარში იქნება მზად, თუმცა ამ ეტაპზე მხოლოდ ერთი სართულის რესტავრაცია მიმდინარეობს.
"ჯერჯერობით მხოლოდ პირველ სართულზე კეთდება რემონტი, დარჩენილია მეორე და მესამე სართული, სადაც ფინანსების გადმორიცხვის შემდეგ მოხერხდება მუშაობის დაწყება. ამ ეტაპზე, დარიცხული თანხით მხოლოდ პირველ სართულს ვარემონტებთ. ვფიქრობთ, შენობა წელიწად-ნახევარში იქნება მზად", - განაცხადა კოტეტიშვილმა.
"მწერალთა კავშირის" შენობა 1903-1905 წლებში აშენდა. იგი ქართველ მეწარმესა და მეცენატს, დავით სარაჯიშვილს ბერლინელი არქიტექტორის, კარლ ცაარისთვის დაუკვეთავს. 1921 წლიდან აქ დამოუკიდებელი "ხელოვანთა კავშირი", ხოლო შემდგომ საბჭოთა საქართველოს "მწერალთა კავშირი" განთავსდა.
