სრულიად საქართველოს კათოლიკოს-პატრიარქმა, უწმინდესმა და უნატერესმა ილია მეორემ ქართველ ემიგრანტებს სამშობლოში დაბრუნებისკენ მოუწოდა. როგორც პატრიარქმა სამების საკათედრო ტაძარში ქადაგებისას ბრძანა, ვერავითარი უცხო ქვეყანა ვერ შეედრება საქართველოს
"ვიმყოფებოდი გერმანიაში, სადაც შევხვდი ექიმებს, რომლებმაც მომცეს იმედი, რომ ყველაფერი კარგად იქნება. მინდა გითხრათ, რომ ვერავითარი უცხო ქვეყანა ვერ შეედრება საქართველოს. ჩვენ გვაცილებდა 500-600 ადამიანი, რომლებიც სხვადასხვა ქალაქებიდან ჩამოვიდნენ. მე მათ ვუთხარი, რომ აქ შეიძლება არის ბევრი სასმელი და ჩასაცმელი, მაგრამ ის რაც არის საქართველოში, აქ არ არის. ეს არის მადლი ღვთისა, ეს არის წყალობა და მფარველობა ღვთისა და ამას ჩვენ განსაკუთრებით ვგრძნობთ მაშინ, როდესაც ჩვენ მივდივართ უცხო ქვეყანაში. ჩვენი ქართველი თანამემამულეები იქ დალხინებულად არ არიან, მათაც უჭირთ. ზოგი მუშაობს, ზოგიც სწავლობს. მე მათ მოვუწოდე, რომ სამშობლოში დაბრუნდნენ და იშოვონ აქ, ჩვენს ქვეყანაში სამსახური", - ბრძანა პატრიარქმა.
ილია მეორემ მადლობა გადაუხადა მრევლს ლოცვისთვის და ბრძანა, რომ მრევლის ლოცვით ატარებს მძიმე ჯვარს.
