პოლიტიკური პარტია „განახლებული საქართველოსთვის" განაგრძობს რეგიონალური და რაიონული ორგანიზაციების დაფუძნებას მთელი ქვეყნის მასშტაბით. გუშინ პარტიის ლიდერმა ნანა გულუამ და გუნდის წევრებმა კიდევ ერთი რაიონული ორგანიზაცია დააფუძნეს ლანჩხუთში (გურია) და გამართეს შეხვედრები მხარდამჭერებთან. „განახლებული საქართველოსთვის" ლაჩხუთის რაიონული ორგანიზაციის თავმჯდომარედ ერთხმად იქნა არჩეული ალექსანდრე მახათაძე, პროფესიით ეკონომისტი, რომელიც კარგად იცნობს რაიონის პრობლემებს.
გურიაში, ისევე როგორც მთელს საქართველოში, უმწვავეს პრობლემად რჩება დასაქმება. რაიონის მოსახლეობის 90% დაუსაქმებელია და ოჯახს ვერ არჩენს. მიუხედავად იმისა, რომ რაიონის ბიუჯეტი ხუთ მილიონ ლარს შეადგენს, არ არის ორიენტირებული სოციალურ პროექტებზე და ვერანაირად ვერ უზრუნველყოფს მოსახლეობის სოციალური და ეკონომიკური პრობლემების გადაწყვეტას. მოშლილია რაიონის ინფრასტრუქტურა, გაჩერებულია წარმოება, მოსახლეობას დაკარგული აქვს ტრადიციული სარეალიზაციო ბაზარი, დაფნის, ციტრუსებისა და ჩაის გასატანად მეზობელ რესპუბლიკებში. ახალგაზრდობას არა აქვს ელემენტარული პირობები სპორტული და კულტურული ცხოვრებისათვის, მწვავედ დგას წყლით, გაზით მომარაგებისა და შიდა გზების რეაბილიტაციის საკითხი, რომლის მოგვარებაც არ ძალუძს ადგილობრივ ხელისუფლებას მცირე ბიუჯეტით. ოჯახებიდან მასიურად შეინიშნება ქალების მიგრაცია მეზობელ თურქეთში, რაც იწვევს ოჯახების დანგრევას და მოზარდთა აღზრდა-განათლების სერიოზულ პრობლემებს. ახალგაზრდებში კატასტროფულად მომატებულია ნარკომანიის შემთხვევები.
„ჩვენი ქალები უნდა დაუბრუნდნენ ოჯახებს, მამაკაცებმა უნდა დაიბრუნონ სამუშაო ადგილები, აღიდგიგონ ღირსება, რათა ქვეყანა ამ უმწვავესი კრიზისიდან გამოვიდეს და აღდგეს ნორმალური ცხოვრების რიტმი. ჩვენ პოლიტიკაში მოვდივართ სუფთა ხელებით, რათა ძალაუფლება დავუბრუნოთ ხალხს, რომელიც მათ ხელისუფლებამ წაართვა. „პოლიტიკური პარტიების შესახებ" კანონში განხორციელებული ცვლილებებით მან პრაქტიკულად აკრძალა სიკეთის კეთება და მოსახლეობის დახმარება, რითაც ხელ-ფეხი შეუკრა ჩვენი პარტიის მხარდამჭერ ბიზნესმენებს, როგორც საქართველოში, ისე მის ფარგლებს გარეთ, მათ შორის მინდია გულუას, რომელსაც ხელისუფლება არ აძლევს ქვეყანაში შემოსვლის ნებას და უკრძალავს მრავალმილიონიანი ჯანდაცვის, განათლების, მცირე ბიზნესისა და სხვა სოციალური პროექტების განხორციელების საშუალებას. მიუხედავად ამისა ჩვენ არ დავკარგავთ კონტაქტს ჩვენს მხარდამჭერებთან, არ მივატოვებთ მათ და ყოველმხრივ დავეხმარებით შესაძლებლობების ფარგლებში", - აღნიშნა თავის მიმართვაში ნანა გულუამ. უახლოეს მომავალში პარტია „განახლებული საქართველოსთვის" რაიონულ ორგანიზაციებს გახსნის კახეთსა და სამეგრელოში.
მასალის გამოყენების პირობები