ბრიტანეთის ბიბლიოთეკამ გამოაქვეყნა მწერალ შარლოტა ბრონტეს იშვიათი წერილები, რომელიც მასწავლებლის, ბელგიელი კონსტანტინე ეჟესთვისაა მიწერილი. წერილები, საიდანაც ჩანს მწერლის რომანტიული დამოკიდებულება მასწავლებლისადმი, დაიბეჭდა კრებულში "სასიყვარულო წერილები: რომანების ორი ათასი წელი".
როგორც The Daily Telegraph წერს, წერილები 1844 წელს დაიწერა, მაშინ, როცა შარლოტა 28 წლის იყო. ამ დროს დები ბრონტეები ბრიუსელში იმყოფებოდნენ, სადაც ეჟეს სკოლაში სწავლობდნენ, ხოლო შემდგომ ამ სკოლის მასწავლებლები იყვნენ.
ეჟემ, რომელმაც ბრონტესგან რამდენიმე წერილი მიიღო, დახია ისინი, მისმა მეუღლემ კი ეს წერილები აღადგინა. წერილების შინაარსი მწერალმა ელიზაბეტ გასკელმა თავად ეჟესგან შეიტყო. მოგვიანებით, გასკელმა შარლოტა ბრონტეს ბიოგრაფია დაწერა, თუმცა ამის შესახებ გვიან გახდა ცნობილი.
"ჯეინ ეარის" ავტორის გრძნობების შესახებ მკითხველმა პირველად 1913 წელს შეიტყო, როდესაც ისინი ბრიტანულ ბიბლიოთეკას გადაეცა და გაზეთ "ტაიმსში" გამოქვეყნდა.
წიგნის პრეზენტაცია 11 თებერვალს გაიმართება. კრებულში ბრონტეს წერილებთან ერთად ოსკარ უაილდის, ლორდ ჰორაციო ნელსონის, ჩარლზ დიკენსისა და სხვათა მიმოწერა გამოქვეყნდება.