ერთადერთი კაცი, ვინც საქართველოს ნატო-ში გაწევრიანებას ხელს უშლის მიხეილ სააკაშვილია. ამის შესახებ განცხადება ბიძინა ივანიშვილმა ვიდეომიმართვაში გააკეთა, რომელიც აშშ-სა და საქართველოს პრეზიდენტების შეხვედრას შეეხება.
"ბარაკ ობამამ კიდევ ერთხელ დაასაბუთა, რომ აშშ მხარს უჭერს საქართველოს ნატო-ში გაწევრიანებას, რაზეც ჩვენმა პრეზიდენტმა გააკეთა რეაქცია, რომ კარგი არის რომ ამერიკა მხარს გვიჭერს. მაგრამ მარტო ამერიკა ამას არ წყვეტს, ეს გადაწყვეტილება ნატო-ში შემავალ ქვეყნებზეც არის დამოკიდებული. მე არ მეგულება ნატო-ს არცერთი წევრი ქვეყანა, რომელიც პრინციპულად საწინააღმდეგო პოზიცია გააჩნდეს საქართველოს ნატო-ში გაწევრიანებასთან დაკავშირებით. ერთდაერთი კაცი ვინც ამას ხელს უშლის, არის ბატონი მიხეილ სააკაშვილი, რომელიც თავისი ქმედებით გამოკვეთილად ეწინააღმდეგება ნატო-ში საქართველოს გაწევრიანების პერსპექტივას", - განაცხადა ივანიშვილმა.
მისი თქმით, საქართველოს აბსოლუტური უმრავლესობა მხარს უჭერს საქართველოს ნატო-ში გაწევრიანებას და ისიც მიესალმება ნატო-ში საქართველოს გაწევრიანების პერსპექტივას.
ვიდეომიმართვა ბიძინა ივანიშვილის "ფეისბუკის" ოფიციალურ გვერდზე გამოქვეყნდა.