თელავის რაიონის სოფელ წინანდალში საბავშვო ბაღის სახურავმა თოვლის სიმძიმეს ვერ გაუძლო და ჩაინგრა. შემთხვევა შაბათ საღამოს მოხდა და არავინ დაშავებულა. საბაშვო ბაღში მუშაობა შეჩერებულია.
როგორც კახეთის საინფორმაციო ცენტრს წინანდლის ტერიტორიული ორგანოს რწმუნებულმა არჩილ მეგუთნიშვილმა განუცხადა, შენობა მოძველებულია, შიფერით იყო დახურული, თოვლი 50 სანტიმეტრზე იდო და სიმძიმეს ვერ გაუძლო. მიმდინარეობს სარეაბილიტაციო სამუშაოები.
თელავის სახანძრო - სამაშველო სამსახურის თანამშრომლებმა შენობა თოვლისგან უკვე გაწმინდეს.
თელავის მუნიციპალიტეტის გამგებლის მოადგილის ვაჟა ზუროშვილის თქმით, წინანდლის საბავშვო ბაღის სახურავის შესაკეთებლად თელავის მუნიციპალიტეტის გამგებლის სარეზერვო ფონდიდან საჭირო თანხა გამოიყოფა.
