31 იანვარს, 20:00 საათზე, ბიზნეს ცენტრი ბესიკის ქუჩაზე უჩვეულო და ძალიან საინტერესო ღონისძიების ეპიცენტრი გახდება. გამოვიდა ჟურნალ „ამარტა"-ს ახალი ნომერი, რომელსაც თან ერთვის ექსკლუზიური ფოტო პროექტი „არქიტექტურა+მოდა = ხელოვნებას 3D".
სამგანზომილებიანი პროექტის ავტორები და ფოტოგრაფები ზურა არაბიძე და ლევან აჯიაშვილი არიან. ხანგრძლივი ფოტო გადაღებების და მათი დამუშავების შედეგი, ჟურნალში ჩანართის სახით არის და თან მოყვება სათვალე, რათა მკითხველმა შეძლოს მისი მესამე განზომილებაში აღქმა. რაც შეეხება პრეზენტაციაზე დამსწრე საზოგადოებას, მათ უნიკალური შესაძლებლობა მიეცემათ ნახონ ეს ფოტოები თითქმის 2 X 1 მეტრზე დაბეჭდილი, რაც კიდევ უფრო მეტად შთამბეჭდავი იქნება.
10 მოდელი - პროფესიონალი და უბრალოდ, სახასიათო გარეგნობის მქონე, საინტერესო ადამიანია აღბეჭდილი ამ ფოტოებზე, გადაღებები კი ქალაქის ბოლოში მდგარ არაშენებული სახლის კონსტრუქციაზე მიმდინარეობდა, სადაც ქარში და სიცივეში, პოზირებდნენ ნატა მურვანიძე, ლენუკა ყიფშიძე, მაგდა გველესიანი, ნინო ახობაძე, ნინო ჭიჭინაძე, მაია სუმბაძე, ლაშა ჯაფარიძე, მარიამ სანოგო და თავად ფოტოგრაფი, ზურა არაბიძე.
გამოფენაზე მოსული სტუმრები ამ პროქტს გამოფენის სახითაც ნახავენ.
სამგანზომილებიანი პროექტის გარდა, „ამარტა" როგორც ყოველთვის უამრავ ექსკლუზიურ მასალას სთავაზობს მკითხველს: ჯიჯი რეჯინის პროექტი „Devotions" რომელიც შავ-თეთრში აერთიანებს შემდეგი დიზაინერების კოლექციებს: დათუნა სულიკაშვილი, ტატუნა ნიკოლაიშვილი, გოლა და ლაშა მდინარაძე, იგივე გუდუ, რომლის კოსტიუმიც „ამარტა"-ს ზამთრის გამოცემის გარეკანს ამშვენებს.
ამის გარდა, ახალ ნომერში იხილავთ და წაიკითხავთ: სოფო ჭყონია, რუსკა მაყაშვილი, ნიკოლას გრეგორიანი, ლაშა დევდარიანი, პეგი გუგენჰაიმი, ჩინური ბუმი, ახალგაზრდა დიზაინერების კონკურსი "BE NEXT", ბრიტანეთის Fashion Awards, Versace for H&M და რაც მთავარია ექსკლუზიური ფოტო მასალა CHANEL Paris - Bombay 2011/12.
აღსანიშნავია, რომ „ამარტა"-ში დაბეჭდილი ადგილობრივი და საერთაშორისო მასალა მოწოდებულია პარტნიორი ფოტო და სხვა და სხვა ტიპის კონტრაქტორი სააგენტოების მიერ, რაც ხარისხის გარანტია და შეესაბამება საერთაშორისო სტანდარტებს საავოტორო უფლებასთან დაკავშირებით.