"აფხაზეთის სამართალდამცავ ორგანოებს საქართველოს მოქალაქე მამუკა მაისურაძე არ დაუკავებიათ", - ინფორმაცია ამის შესახებ, აფხაზური მედიის განცხადებით, აფხაზეთის ე.წ. შს სამინისტრომ და ე.წ. სახელმწიფო უშიშროების საბჭომ გაავრცელეს.
აფხაზური მედიის ინფორმაციით, აფხაზეთში ქართველი სასულიერო პირის, მღვდემსახური იონას (მამუკა მაისურაძე) დაკავებას არ ადასტურებს არც აფხაზეთის ე.წ. შს მინისტრი ოთარ ხეცია და არც აფხაზეთის ე.წ. სახელმწიფო უშიშროების საბჭოს მდივნის მოვალეობის შემსრულებელი ნუგზარ სამსონია.
"სიებში, რომლებშიც მდინარე ენგურზე მდებარე საკონტროლო-გამშვები პუნქტის "ენგურის" ქართულ-აფხაზური საზღვრის ლეგალურად გადმომკვეთები აღირიცხებიან, მ. მაისურაძე არ არის. ამასთან ერთად ბოლო ორი კვირის განმავლობაში არალეგალურად დაკავებული და გათავისუფლებყულ ადამიანთა ნუსხშიც არ არის ეს გვარი", _ განაცხადა გალის უშიშროების განყოფილების უფროსმა თემურ შენგელიამ.
აფხაზური მედია აღნიშნავს: "ელექტრონული მედიით გავრცელებული ინფორმაციის მიხედვით, სავარაუდოდ, საუბარი მიდის მამუკა მაისურაძეზე, რომელიც 2009 წლის თებერვალში ქალაქ სოჭში რუსეთის სპეცსამსახურებმა საქართველოს სასარგებლოდ ჯაშუშობაში დაადანაშაულეს. რუსეთის სპეცსამსახურებმა განაცხადეს, რომ ინტერნეტკაფეს მფლობელი მაისურაძე არალეგალურად ჩავიდა რუსეთის ფედერაციაში და შეეცადა საქართველოს სპეცსამსახურების აგენტურული ქსელი შეექმნა. ამის შემდეგ იგი საქართველოში გააძევეს, სადაც მან სასულიერო ჩინი მიიღო".
