საზოგადოებრივმა მოძრაობამ „ქართული ოცნება" შეასრულა საქართველოს კონტროლის პალატის ფინანსური მონიტოორინგის სამსახურის კანონიერი მოთხოვნა და მოჩვენებითი გარიგების საფუძველზე, იურიდიული პირისაგან უკანონოდ მიღებული შემოწირულობა 1.100.000 (ერთი მილიონ ასი ათასი ლარი) ლარის ოდენობით - შპს „ელიტა ბურჯს" უკან გადაურიცხა. ამის შესახებ კონტროლის პალატის ფინანსური მონიტორინგის სამსახურის უფროსის, ნათია მოგელაძის განცხადებაშია ნათქვამი.
"საქართველოს კონტროლის პალატა კარგად აცნობიერებს კანონით მონიჭებული მანდატის ფარგლებს. შესაბამისად, ამ კონკრეტულ შემთხვევაშიც და მომავალშიც აქტიურად გააგრძელებს საქმიანობას პოლიტიკური დაფინანსების კანონიერებისა და გამჭვირვალობის უზრუნველსაყოფად, რათა ხელი შეუწყოს ჯანსაღი და კონკურენტული პოლიტიკური-სარჩევნო გარემოს შექმნას და ყველა სუბიექტს, განურჩევლად მათი პოლიტიკური ხედვისა და სიმპატიებისა, მიეცეს საშუალება თანასწორუფლებიან პირობებში აწარმოოს პოლიტიკური საქმიანობა", - აღნიშნულია განცხადებაში.
ნათია მოგელაძის მტკიცებით,საქართველოს კონტროლის პალატა კიდევ ერთხელ აცხადებს, რომ კანონით მონიჭებული უფლებამოსილების ფარგლებში, ყველა პოლიტიკურ სუბიექტთან მჭიდრო თანამშრომლობას გეგმავს და მოუწოდებს მათ, საქმიანობა განახორციელონ კანონის მოთხოვნების ფარგლებში, რადგან კანონის რეგულაციების გვერდის ავლის ყველა მსგავსი მცდელობა გახდება საჯარო საზოგადოებისათვის და გამოყენებულ იქნება კანონით გათვალისწინებული ღონისძიებები.
შეგახსენებთ, რომ კონტროლის პალატის ფინანსური მონიტორინგის სამსახურმა "ქართულ ოცნებას" "ელიტა ბურჯისგან" აღებული 1 100 000 ლარის უკან დაბრუნება მოსთხოვა.