ვენეციის კომისია არასდროს არ გზავნის გამზადებულ კანონს, რომელსაც პარლამენტში მხოლოდ ბეჭედს დაარტყავენ. ამის შესახებ საქართველოს პარლამენტის თავმჯდომარემ დავით ბაქრაძემ „მოქალაქეთა პოლიტიკური გაერთიანებების შესახებ" კანონში შეტანილ ცვლილებებზე ვენეციის კომისიის მდივანის თომას მარკერტის განაცხადების შეფასებისას აღნიშნა.
„ვენეციის კომისიას ყოველთვის ეგზავნება კანონის წინასწარი ვარიანტი, რის შემდეგაც პროექტი განხილვას საპარლამენტო დებატებზე გადის, რის შედეგადაც ცვლილებების შეტანა ყოველთვის ხდება", - აღნიშნა ბაქრაძემ.
ამასთან, ყველა დაინტერესებულ პირს პარლამენტის თავმჯდომარემ მოუწოდა პარლამენტის მიერ მიღებული კანონი ვენეციის კომისიის ოფიციალურ ვებგვერდზე გამოქვეყნებულ კანონპროექტს შეადარონ.
„ვენეციის კომისია არასდროს გვიგზავნის გამზადებულ კანონს, რომელსაც აქ პარლამენტში ურტყავთ ბეჭედს. თუ შეადარებთ კომისიის ვებგვერდზე გამოქვეყნებულ ვარიანტსა და პარლამენტის მიერ მიღებულს ნახავთ, რომ პრინციპების დონეზე ვენეციის კომისიამ იმსჯელა ყველა საკითხზე, რომელიც საბოლოოდ კანონშია ასახული", - განაცხადა ბაქრაძემ.
შეგახსენებთ, რომ ვენეციის კომისიის მდივნის თომას მარკერტის განცხადებით, ვენეციის კომისიას არ უნახავს უკანასკნელი ცვლილებების პროექტი.
„ჩვენ განვიხილეთ კანონპროექტი დეკემბერში და ჩვენი მოსაზრებები ამ კანონპროექტთან დაკავშირებით გამოვთქვით. თუმცა, მოგვიანებით ისეთ ვერსიას ეყარა კენჭი, რომელშიც შევიდა, ჩვენი აზრით, არსებითად განსხვავებული ცვლილებები და ახალ კანონში სახეზეა მთელი რიგი დამატებითი აკრძალვები",- აღნიშნა თომას მარკერტმა ევროსაბჭოში გამართულ პრესკონფერენციაზე.