უფლებადამცველ სოზარ სუბარის განცხადებით, "ქართული ოცნების" მხარდამჭერს ეკატერინე ლემონჯავას, კუდ-ის თანამშრომლები უშიშროების სამსახურთან თანამშრომლობას აიძულებდნენ.
როგორც სუბარმა დღეს, "ქართული ოცნების" ოფისში გამართულ ბრიფინგზე განაცხადა, ლემონჯავა იძულებით გადაიყვანეს თავისი როკ-კლუბიდან შსს-ს უშიშროების განყოფილებაში და შეურაცხყოფას აყენებდნენ.
"ლემონჯავას განცხადებაც დააწერინეს, რომ ის ითანამშრომლებდა შსს-თან, მაგრამ ეს განცხადება მან მხოლოდ იმიტომ დაწერა რომ იქიდან გამოსულიყო. გათავისუფლების შემდეგ მე მომმართა და შალვა რამიშვილს. მე და "ქართული ოცნება" ლემონჯავას უფლებებს დავიცავთ. შალვა რამიშვილის დახმარებით კი, ერთ-ერთი იმ ადამიანის ფოტო და კადრები გვაქვს, რომელიც ცდილობდა ლემონჯავას გადაბირებას. ეს ფაქტი მხოლოდ და მხოლოდ იმის გამო მოხდა, რომ ლემონჯავა ერთი კვირის "ქართული ოცნების" მხარდამჭერი გახდა", - განაცხადა სუბარმა.
ლემონჯავას თქმით კი, მისგან მოითხოვდნენ, რომ ქვეყნის ინტერესების გამო გარკვეულ ადამიანებზე ინფორმაცია მიმეწოდებინა უშიშროების სამსახურისთვის.
"მე სახელიც კი შემირჩიეს "როკერა", მაგრამ მაპატიოს ჩემმა სამშობლომ, თუ ამ შემთხვევაში ჩემი ღირსება უფრო მაღლა დავაყენე", - განაცხადა ეკატერინე ლემონჯავამ.
"აღნიშნული ქმედება შეიცავს სისხლის სამართლის დანაშაულის ნიშნებს და შესაბამის ორგანოებს სთხოვს სისხლის სამართლის საქმის აღძვრას", - ეს განცხადება კი "ქართული ოცნების" ადვოკატმა შალვა თადუმაძემ გააკეთა.
მომხდარის თაობაზე ლემონჯავამ წერილობით აცნობა საქართველოს მთავარ პროკურორს მურთაზ ზოდელავას.
