საარჩევნო სუბიექტები სატალევიზიო რეკლამის ხარჯების დასაფარად სახელმწიფოსგან არაუმეტეს 600 ათას ლარს მიიღებენ. როგორც დღეს იურიდიულ საკითხთა კომიტეტის თავმდჯომარემ პავლე კუბლაშვილმა განაცხადა, მოქალაქეთა პოლიტკური გაერთიანების შესახებ კანონის 30-ე მუხლს დაემატება მე-12 პუნქტი, რომელიც პარტიებისთვის საარჩევნო წელს სატელევიზიო რეკლამისთვის დამატებითი თანხის გამოყოფას ითვალისწინებს.
საარჩევნო წელს პოლიტიკური პარტიების საარჩევნო კამპანიის ფინანსური მხარდაჭერის მიზნით, სახელმწიფოს ბიუჯეტიდან დამატებით გამოიყოფა დაფინანსება სატელევიზიო რეკლამის განთავსების ხარჯების დასაფარად. ამ პუნქტით გათვალისწინებულ თანხებს მიიღებენ მხოლოდ ის პოლიტიკური გაერთიანებები, რომლებიც დაფინანსებას იღებენ უკანასკნელი საერთო არჩევნების შედეგების მიხედვით (2010წლის 30 მაისის თვითმმართველობის არჩევნები).
პოლიტიკური გაერთიანებებისათვის გამოყოფილი თანხების რაოდენობის დაანგარიშების მიზნით შესაბამისი საარჩევნო სუბიექტების მიერ მიღებული ხმების რაოდენობა მრავლდება სამზე და იყოფა საარჩევნო სუბიექტებში შემავალ პოლიტიკური გაერთიანებების რაოდენობაზე. ამასთან, ერთი საარჩევნო სუბიექტისთვის (საარჩევნო სუბიექტში შემავალი პოლიტიკური გაერთიანებებისთვის ჯამურად) განკუთვნილი თანხების ოდენობა არ უნდა აღემატებოდეს 600 ათას ლარს.
როგორც კუბლაშვილი აცხადებს, სატელევიზიო რეკლამისთვის პოლიტიკურ პარტიებს აღნიშნული თანხები რეზრევებიდან გადაეცემათ და სავარაუდოდ, სახელმწიფო ბიუჯეტში ცვლილებები საჭირო არ იქნება.
სატელევიზიო რეკლამისთვის დაფინანსებას სულ 5 საარჩევნო სუბიექტი მიიღებს, რომელშიც 12 პოლიტიკური პარტია შედის. სატელევიზიო რეკლამისთვის პარტიებს ჯამში 2 229 291 ლარი გამოეყოფათ. კანონში ცვლილებების ინიცირება საგაზაფხულო სესიის გახსნისთანავე მოხდება.
