მკაცრი აღრიცხვის დოკუმენტების ენობრივი სისწორის შემოწმება ფასიანი ხდება. აღნიშნულთან დაკავშირებით საქართველოს განათლებისა და მეცნიერების მინისტრის ბრძანება უკვე ძალაშია.
მიღებული გადაწყვეტილების თანახმად, მკაცრი აღრიცხვის დოკუმენტების ენობრივი სისწორის შემოწმების საფასური 20 ლარს შეადგენს, ხოლო 1 სამუშაო დღის განმავლობაში დაჩქარებული წარმოების შემთხვევაში 40 ლარს.
აღნიშნული საფასური გადაიხდება ხდება წინასწარ, შესაბამისი მომსახურების გაწევამდე, უნაღდო ანგარიშსწორებით ცენტრის ანგარიშსწორების ანგარიშზე.
იმ შემთხვევაში კი თუ დაინტერესებული პირი მისგან დამოუკიდებელი მიზეზით ვერ მიიღებს მომსახურებას მის მიერ გადახდილი საფასურის შესაბამის ვადაში და სურვილი აქვს, ისარგებლოს სხვა ვადით, რომლისთვისაც დადგენილია ნაკლები საფასური, მას უბრუნდება ამ ორ საფასურს შორის სხვაობა.
ამასთან, საფასური ბრუნდება დაინტერესებული პირის წერილობითი მოთხოვნიდან 10 სამუშაო დღის ვადაში. მოთხოვნა წარდგენილი უნდა იყოს საფასურის გადახდიდან 3 თვის ვადაში, წინააღმდეგ შემთხვევაში მისი გასვლის შემდეგაც გადახდილი თანხა პირს უკან აღარ დაუბრუნდება.
გარდა ამისა, მკაცრი აღრიცხვის დოკუმენტის ენობრივი სისწორის შემოწმების საფასურის გადახდისაგან თავისუფლდება სახელმწიფო ან ადგილობრივი თვითმმართველობის ორგანო, ასევე საჯარო სამართლის იურიდიული პირი.
ასევე საფასურის გადახდა არ მოუწევთ იმ პირებს, რომლებსაც ბრძანების ამოქმედებამდე შეტანილი ჰქონდა მკაცრი აღრიცხვის დოკუმენტის ენობრივი სისწორის შემოწმების შესახებ განცხადება.
