2010 წლის თვითმმართველობის არჩევნებზე ბარიერგადალახული პარტიები სატელევიზიო რეკლამისთვის სახელმწიფოსგან დამატებით დაფინანსებას მიიღებენ. ამის შესახებ ჟურნალისტებს იურიდიულ საკითხთა კომიტეტის თავჯდომარემ, პავლე კუბლაშვილმა განუცხადა. მისი თქმით, შესაბამისი ცვლილება "მოქალაქეთა პოლიტიკური გაერთიანების შესახებ კანონში" განხორციელდება.
"ვასრულებთ პირობას იმ წინადადებასთან დაკავშირებით, რომელიც ჯერ კიდევ ნოემბერში გაჟღერდა. მაშინ ვთქვით, რომ მნიშვნელოვანია პარტიების სახელმწიფო დაფინანსება ისეთი იყოს, რომ მათ შეეძლოთ ნორმალური წინასაარჩევნო კამპანიის წარმოება. პირველ რიგში, ეს ეხება სატელევიზო რეკლამის საკითხებს", - აღნიშნა კუბლაშვილმა.
მისი თქმით, საარჩევნო წელს პარტიებისთვის გაჩნდება სახელმწიფო დაფინანსების მექანიზმი სატელევიზო რეკლამისთვის, თუმცა ამ დაფინანსებას მხოლოდ ბოლო არჩევნებში ბარიერგადალახული პარტიები მიიღებენ. რაც შეეხება იმას, თუ როგორ განაწილდება აღნიშნული თანხები, კუბლაშვილი აცხადებს, რომ დეტალებთან დაკავშირებით განცხადებას 27 იანვარს დაგეგმილ პრესკონფერენციაზე გააკეთებს.
სავარაუდოდ, პარტიებისთვის გამოყოფილი თანხები მილიონ ლარზე მეტი იქნება, თუმცა უმრავლესობის წევრის მტკიცებით, აღნიშნული ცვლილებები ბიუჯეტში ცვლილებების შეტანას არ გამოიწვევს და მისი მობილიზება რეზერვებიდან მოხდება.
აღსანიშნავია, რომ 2010 წლის 11 მაისს თვითმმართველობის არჩევნებზე ბარიერი ხუთმა პოლიტიკურმა სუბიექტმა გადალახა.