პარლამენტის თავმჯდომარე დავით ბაქრაძე ბორჯომის მუნიციპალიტეტის მოსახლეობას შეხვდა და წყლის საფილტრაციო სადგურის ახლად აგებული სათავე ნაგებობა დაათვალიერა.
"ეს არის ნამდვილად ევროპული ხარისხის და სტანდარტის წყლის გამწმენდი ნაგებობა, რომლის მწყობრში შესვლით ბორჯომში წყლის პრობლემა სრულად მოგვარდება. ზაფხულში, ახალ ტურისტულ სეზონზე, ბორჯომში იქნება 24-საათიანი წყალმომარაგება და უმაღლესი ხარისხის სუფთა წყალი", - განაცხადა ბაქრაძემ.
მისი ინფოამციით, მიმდინარე წელსვე ასევე იგეგმება რამდენიმე ახალი სასტუმროს აშენება, ბორჯომის პარკისა და პლატოს რეაბილიტაცია.
"ეს ინფრასტრუქტურული პროექტები ერთად - წყალი, გაზიფიკაცია, გზები, სასტუმროები - ემსახურება იმას, რომ უკვე ამ ტურისტული სეზონიდან ბორჯომი მზად იყოს სტუმრების მისაღებად. ბორჯომი ამით აღიდგენს იმ ფუნქციას, სახელს და ნიშას, რომელიც მას ყოველთვის ჰქონდა, როგორც ერთ-ერთ გამორჩეულ კურორტს საქართველოში", - აცხადებს პარლამენტის თავმჯდომარე.
შეგახსენებთ, რომ წყლის საფილტრაციო სადგურის მშენებლობა გასული წლის გაზაფხულზე დაიწყო, რომლის სამშენებლო ნაწილი და ტექნოლოგიური ხაზი თებერვლის ბოლოსთვის დასრულდება. პროექტის განხორცილებისთვის დაახლოებით 8 მილიონი ლარი დაიხარჯება.
