ამერიკაში მცხოვრები ქართველი პიანისტი ეთერ ანჯაფარიძე საქართველოში კონცერტს გამართავს. საღამოში მონაწილეობას მაკა მახარაძის საბალეტო სტუდიის ბავშვები მიიღებენ. ამის შესახებ "ჯი-ეიჩ-ენს" მახარაძემ განუცხადა.
"მან თავად გამოთქვა სურვილი, ჩამოსულიყო საქართველოში და ჩვენს ბავშვებთან ერთად კონცერტი გაემართა. ეთერი 26 მარტს ჩამოვა და ოთხ რეპეტიციას მოვასწრებთ კონცერტამდე. ეს იქნება ფრანგული მუსიკის საღამო, სადაც ზღაპრებს "პატარა სპილო ბაბარის ამბავს" და სათამაშო ყუთს" ეთერ ანჯაფარიძე და ჩემი ბავშვები გააცოცხლებენ", - განუცხადა "ჯი-ეიჩ-ენს" მახარაძემ.
კონცერტი 31 მარტს და პირველ აპრილს რუსთაველის თეატრის მცირე სცენაზე გაიმართება.
პიანისტი და პედაგოგი ეთერ ანჯაფარიძე დაიბადა სახელოვანი მუსიკოსების ოჯახში; მამა, ზურაბ ანჯაფარიძე, გამოჩენილი ქართველი ტენორი იყო, დედა, ივეტა ბახტაძე - პიანისტი და პედაგოგი. დაამთავრა მოსკოვის სახელმწიფო კონსერვატორია და ასპირანტურა პროფესორ ვერა გორნოსტაევას ხელმძღვანელობით. ეთერ ანჯაფარიძე პირველი საბჭოთა პიანისტია, რომელმაც მონრეალის საერთაშორისო კონკურსში გაიმარჯვა 1976 წელს და გრანპრის მფლობელი გახდა. 1974 წელს მან ჩაიკოვსკის სახელობის საერთაშორისო კონკურსში მოსკოვში მეოთხე პრემია მოიპოვა. მას შემდეგ გამოდის მსოფლიოს სხვადასხვა სცენაზე სოლო და კამერული პროგრამებით და თანამშრომლობს როგორც სოლისტი განთქმულ ორკესტრებთან და გამოჩენილ დირიჟორებთან, როგორებიც არიან ჯ. კახიძე, ვ. სპივაკოვი, ვ. გერგიევი, ი. ტემირკანოვი, ჯ. დეპრისტი და სხვ.. 1992 წლიდან საკონცერტო და პედაგოგიურ მოღვაწეობას ეწევა ამერიკის შეერთებულ შტატებში; რეგულარულად ატარებს მასტერკლასებს და არის ხელმძღვანელი სასწავლო-საშემსრულებლო პროგრამის AmerKlavier. ასწავლიდა თბილისისა და მოსკოვის სახელმწიფო კონსერვატორიებში და აგრეთვე ნიუ-იორკისა და ჩიკაგოს დეპოლის უნივერსიტეტების პროფესორი იყო. არის GRAMMY-სა და Deutsche Schallplatten-ის ნომინანტი, საქართველოს სახალხო არტისტი, ხალხთა მეგობრობის საერთაშორისო ორდენისა და ღირსების ორდენის კავალერი.
