დღეს, 21 იანვარს, 11:00 საათიდან 17:00 საათამდე, სასტუმრო ''ქორთიარდ მარიოტში" საქართველოს ეკონომიკისა და მდგრადი განვითარების სამინისტროს მხარდაჭერით, გაიმართება Google-ის კონფერენცია, სადაც დაგეგმილია თბილისის Google-ის ტექნოლოგიების მომხმარებელთა ჯგუფის (GTUG) დაარსების ცერემონიალი. კონფერენციას დაესწრებიან ახალგაზრდა პროგრამისტები, ოლიმპიადებში გამარჯვებული მოსწავლეები, აი-ტი კომპანიების წარმომადგენლები და სხვა დაინტერსებული პირები.
GTUG -ის ცენტრი საქართველოში ჯერ არ არსებობს და მისი დაარსება ქვეყნისთვის მნიშვნელოვანია. მის ფარგლებში მოხდება დაინტერესებული პროგრამისტებისა და Google-ის ექსპერტების თანამშრომლება, კვალიფიკაციის ამაღლება, ცოდნისა და გამოცდილების გაზიარება სხვა ქვეყნის GTUG ჯგუფის წევრებთან.
ეს ჯგუფი ასევე ხელს შეუწყობს საქართველოში ექსპორტზე ორიენტირებული პროგრამირებისა და ანდროიდ აპლიკაციების შექმნას. ასევე დაეხმარება ქართველ პროგრამისტებს აპლიკაციების ადგილობრივ და საერთაშორისო ბაზარზე გატანაში.
ღონისძიების ფარგლებში სემინარს ჩაატარებს უკრაინელი ექსპერტი, კიევის Google-ის ტექნოლოგიების მომხმარებელთა ჯგუფის დამაარსებელი ვლადიმერ ივანოვი, ასევე Google-ის ვიდეოკონფერენციის სისტემის მეშვეობით მოხდება ჩართვები Google-ის ქართველ და უცხოელ სპეციალისტებთან და მსოფლიოს სხვადასხვა ქალაქის GTUG - ის წევრებთან.
