თუმანიშვილის თეატრში ქეთი დოლიძის სპექტაკლის პრემიერა გაიმართება. როგორც რეჟისორმა "ჯი-ეიჩ-ენს" განუცხადა, სპექტაკლისთვის "სამეფო ოჯახი" ქართველი ვარსკვლავები საგანგებოდ შეარჩია.
"ეს პიესა 1973 წელს მაჩუქა ჩემმა ნათლიამ. პიესა ინგლისურენოვანი იყო და მანანა ანთაძემ თარგმნა. ამ სპექტაკლში მინდოდა ვერიკო ანჯაფარიძეს, სოფიკო ჭიაურელსა და ნანა ჩიქვინიძეს ეთამაშათ, მაგრამ, სამწუხაროდ, ვერ მოხერხდა. ამჯერად ვინც კი ვარსკვლავი გვყავს, ყველა ამ სპექტაკლში ითამაშებს. ეს არ არის სამეფო კარზე მომხდარი ამბები, ეს არის ნაწარმოები მსახიობთა დინასტიაზე, რომელთაც ფანატიკურად უყვართ თავიანთი პროფესია, კომედიური ჟანრია, სადაც არის ბევრი სახალისო ამბავი, კარგი მუსიკა და ულამაზესი კოსტიუმები", - აღნიშნა დოლიძემ.
სპექტაკლის "სამეფო ოჯახი" პრემიერა 21 იანვარს, 19:00 საათზე, მიხეილ თუმანიშვილის სახელობის კინომსახიობთა თეატრში გაიმართება. სპექტაკლი 22 იანვარსაც იქნება წარმოდგენილი. მონაწილეობენ ნინელი ჭანკვეტაძე, ლია კაპანაძე, ქეთი ასათიანი, რამაზ იოსელიანი, ზაზა მიქაშავიძე, აკაკი ხიდაშელი, პაატა ბარათაშვილი, დარეჯან ჯოჯუა, თორნიკე ბზიავა, ირინა გიუნაშვილი, სოსო ხვედელიძე, ილია ჭეიშვილი, ანრი ბიბილეიშვილი.
