აჭარაში გადაუღებლად თოვს. ბათუმში თოვლის საფარმა 15 სანტიმეტრს მიაღწია. ავტომანქანების გადაადგილება შეფერხებულია ბათუმი-ქობულეთის მაგისტრალზე. ბათუმიდან სატრანსპორტო მოძრაობა შესაძლებელია ჩაქვის გვირაბამდე, ქობულეთის მიმართულებით კი გადაადგილება დასაშვებია მხოლოდ მოცურების საწინააღმდეგო ჯაჭვებითა და ორხიდიანი მანქანებით.
საგზაო დეპარტამენტი მთელი ღამის საგანგებო რეჟიმში მუშაობდა. მიმდინარეობს ყველა ცენტრალური და თემის ცენტრამდე მისასვლე გზის გაწმენდა. დიდთოვლობასთან დაკავშირებით აჭარის მთავრობაში შექმნილია საგანგებო შტაბი.
უხვმა ნალექმა, სატრანსპორტო მოძრაობის გარდა, პრობლემები შექმნა ელექტროენერგიის მიწოდების კუთხითაც. ღამით ელექტროენერგიის გარეშე ქობულეთში, ჩაქვსა და მახინჯაურში 12000 აბონენტი დარჩა. დღეს დილით ელექტროენერგია ავარიულად გამოირთო დანდალოს თემში, შუქის გარეშეა დარჩენილი ჭვანის ხეობის 16 სოფელიც. ენერგეტიკოსებმა აღდგენითი სამუშაოები უკვე დაიწყეს და ელექტროენერგიის მიწოდება დღის განმავლობაში აღდგება.
რაც შეეხება მაღალმთიან აჭარას: ხულოსა და შუახევში თოვლის საფარმა მხოლოდ 10-15 საინტიმეტრით მოიმატა. აჭარის საგზაო დეპარტამენტში აცხადებენ, ტექნიკა მობილიზებულია და ამ ეტაპზე მოცურების საწინააღმდეგო ჯაჭვებითა და ორხიდიანი მანქანებით გადაადგილება ყველა თემში დასაშვებია.
