დღეს, ირაკლი ალასანია ქარელის რაიონის სოფლების- დვანის, დირბის, ქვენატკოცას, ფცასა და ბრეძას მცხოვრებლებს შეხვდა და ადგილობრივების პრობლემებს გაეცნო.
"თავისუფალი დემოკრატების" ლიდერის განცხადებით, ამ სოფლებში ხალხი უმძიმეს მდგომარეობაშია.
"ეს სოფლები, პრაქტიკულად სასაზღვრო ზოლშია და პირველ რიგში იმის ახსნა მინდა, რომ ეს ხალხი ქართულ სახელმწიფოებრიობას იცავს. ისინი ჩვენი მესაზღვრეები არიან. წესით გაათმაგებული ყურადღება უნდა ჰქონდეთ მთავრობის მხრიდან, სინამდვილეში კი შეშაც არ მიუციათ მათთვის", - განაცხადა ირაკლი ალასანიამ. მისი თქმით, სოფლებში, სადაც 1000 კომლზე მეტი ცხოვრობს არ არის გზები, გაზი, არ არიან ექიმები, მოსახლეობას არვინ ეხმარება მიწის დამუშავებაში არც ტექნიკით, არც სასუქით და არც საწვავით.
"ჩვენი მთავარი მოთხოვნაა პრეზიდენტის და მთავრობის სპეციალური ფონდიდან, გამოიყოს თანხები, რათა ეს ზამთარი ხალხმა როგორმე გადააგოროს და საგაზაფხულო სამუშაოებისთვის მოემზადოს", - განაცხადა ირაკლი ალასანიამ.
