ჯვრის უღელტეხილზე გაწმენდითი სამუშაო ამ დრომდე მიმდინარეობს, რომლის დასრულების შემდეგ ადამიანები რუსეთის მხარეს გადაადგილებას შეძლებენ.
მცხეთა-მთიანეთში საავტომობილო მოძრაობა პარალიზებულია. თოვლის საფარმა ნახევარ მეტრს გადააჭარბა. სომხეთიდან რუსეთში საქართველოს გავლით ტრანზიტულად მოძრავი რამდენიმე ავტომობილი, მათ შორის ავტობუსები, მსუბუქი მანქანები და ტრაილერები ყაზბეგის მაგისტრალიდან დუშეთში გააბრუნეს. ადგილზე მებაჟეებიც მივიდნენ, რომლებმაც მგზავრების ბარგს ლუქი მოხსნეს, რათა საქართველოში ყოფნის დროს მათ პირადი ნივთებით სარგებლობა შეძლონ. მგზავრები ახლა გამოდარებას ელოდებიან. მათ კვებაზე ქართული მხარე იზრუნებს.
"დუშეთის მუნიციპალიტეტმა თავის თავზე აიღო და ცხელ ერთჯერად საჭმელს გაუკეთებს, აქ არიან სომხეთის მოქალაქეები. უამინდობაა, ნისლია და ქარბუქია, რის გამოც გაწმენდითი სამუშაო ვერ ტარდება. შესაბამისად, როცა გაიხსნება გზა, მოძრაობა აღდგება", - განაცხადა დუშეთის მუნიციპალიტეტის გამგებელმა ლაშა ჯანაშვილმა.
