საქართველოს პრეზიდენტმა მიხეილ სააკაშვილმა ბათუმში თამარისის დასახლებაში დღეს ახალი კვარტალი მოინახულა, რომელიც 3 ათასი დევნილისთვის საგანგებოდ აშენდა.
ყოფილი ნავთობგადამამუშავებელი ქარხნის ტერიტორიაზე 22 საცხოვრებელი კორპუსი 608 ოჯახისთვის მოეწყო. პროექტის ფარგლებში გალამაზდა მიმდებარე ტერიტორია: დაიგო ასფალტის საფარი, ჩატარდა გაზიფიცირების სამუშაო, დამონტაჟდა გარე განათება, მოეწყო წყალგაყვანილობა და კანალიზაცია, ტერიტორია გამწვანდა და აშენდა სპორტული მოედანი ბავშვებისთვის.
ახალი საცხოვრებელი უბნის მშენებლობაზე 5 ათასამდე ადამიანი დასაქმდა, რომელთა უმეტესობა ადგილობრივი მოსახლეა.
პროექტი საქართველოსა და ევროკავშირს შორის გაფორმებული ხელშეკრულების ფარგლებში რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდის კოორდინირებით განხორციელდა.
