„ქრისტიან-დემოკრატები" ხელისუფლებას მოუწოდებენ სიღარიბის ზღვარზე მყოფი მოქალაქეების ჯანმრთელობით დაზღვევა უზრუნველყონ
როგორც დღეს, პრესკონფერენციაზე „ქრისტიან-დემოკრატების" წევრმა მაგდა ანიკავშილმა განაცხადა, აუცილებელია ყველა რაიონის თვითმართველობაში შეიქმნას სპეციალური სადაზღვეო ფონდი, რომელიც სიღარიბის ზღვარზე მყოფ მოქალაქეების ჯანმრთელობის დაზღვევას უზრუნველყოფს.
„საუბარია იმ ოჯახებზე, რომელთაც სოციალური აგენტის შეფასების შემდეგ დააგროვეს 70 000-დან 100 000 სარეიტინგო ქულა. ეს ადამიანები დღეს სახელმწიფოსგან არ იღებენ ფულად შემწეობას და არ სარგებლობენ სადაზღვეო პოლისით, მიუხედავად იმისა, რომ სიღარიბის ზღვარზე იმყოფებიან", - აღნიშნა ანიკაშვილმა.
მისივე შეფასებით, ამ ადამიანების სოციალური მდგომარეობა დაბალი სარეიტინგო ქულის მქონე ოჯახებისგან თითქმის არ განსხვავდება.
„სამედიცინო სერვისის სიძვირის გამო მკურნალობისთვის საჭირო თანხების ანაზღაურებას სახელმწიფო დახმარების გარეშე ეს ადამიანები ვერ ახერხებენ", - აღნიშნა „ქრისტიან-დემოკრატების" წევრმა.
ამასთან, დეპუტატის თქმით, აღნიშნული ინიციატივა განსაკუთრებით მნიშვნელოვანია იმ რეგიონებისთვის, სადაც ახლი საავადმყოფოები იხსნება, რადგან სადაზღვეო პოლისის არარსებობის შემთხვევაში ადგილობრივი მოსახლება ამ კლინიკებით სარგებლობას ვერ შესძლებს.
„მოვუწოდებთ სახელმწიფო რწმუნებულებს, რომ საკუთარ რეგიონებში ჯანდაცვის ხელმისაწვდომობის გზებზე იზრუნონ, რომ სიღარიბის ზღვარზე მყოფი მოსახლეობა დააზღვიონ, როგორც ეს ხდება თბილისა და აჭარაში. ჩვენთვის მიუღებელია მოსახლეობის დისკრიმინაცია გეოგრაფიული ნიშნით", - აღნიშნა ანიკაშვილმა.
