2012 წლიდან მერიის ინიციატივით დამატებით დაზღვეული იქნება 30 000 არაასაკობრივი პენსიონერი. ახალი სადაზღვევო პოლისი თითოეული დაზღვეული ადამიანისთვის ხელმისაწვდომს გახდის შემდეგი სახის ხარისხიან სამედიცინო მომსახურებას: ულიმიტო 24 საათიანი კონსულტაცია, ოჯახის ექიმისა და ექთნის მომსახურება, გადაუდებელი და გეგმიური ქირურგიული ჰოსპიტალური მომსახურება(15000ლარამდე), ონკოლოგიურ პაციენტთა ქიმიოთერაპია, ამბულატორიულ და ჰოსპიტალურ პირობებში ჰორმონო და სხივური თერაპია (12000 ლარამდე), მშობიარობა(500 ლარი) და ულიმიტო ამბულატორიული მომსახურება. დაზღვევა ითვალისწინებს ასევე სამკურნალო საშუალებათა ნუსხის მიხედვით, მედიკამენტების საფასურის ანაზღაურებას წლიური სადაზღვევო ლიმიტის - 50 ლარის ფარგლებში.

დაზღვევის პროგრამის გაგრძელების მიზნით, მერიამ ტენდერი გამოაცხადა, რომელშიც სამმა სადაზღვევო კომპანიამ: ირაომ, ჯი-პი-აიმ და არქიმედეს გლობალ ჯორჯიამ გაიმარჯვა.

თბილისის მერი გიგი უგულავა დღეს ისანი-სამგორის რაიონში მცხოვრებ ღუდუშაურების ოჯახს ეწვია და ოჯახის ორ წევრს მერიის სადაზღვევო პოლისი პირადად გადასცა.

პოლისების დარიგების პროცესი თვის ბოლომდე გაგრძელდება და თითოეულ ბენეფიციარს რაიონული მუნიციპალიტეტის წარმომადგენლები პოლისს სახლში მიუტანენ.

თბილისის მერიის მიერ ასევე დაზღვეულია ის სოციალურად დაუცველი პირები, რომლებსაც მინიჭებული აქვთ 70 000-დან 100 000 ქულა, საბავშვო ბაღის, სახელოვნებო სკოლების, მუზეუმებისა და ბიბლიოთეკების პერსონალი, სასწრაფოსა და საგანგებო სიტუაციების სამსახურის თანამშრომლები, შემოქმედებითი კავშირების წარმომადგენლები, წარმატებული სპორტსმენები, მწვრთნელები და თბილისის რაიონული მუნიციპალიტეტების მიერ აღმოჩენილი ის სოციალურად დაუცველი პირები, რომლებსაც სარეიტინგო ქულა სოციალური მომსახურების სააგენტოს მიერ, მინიჭებული არ აქვთ.
2012 წელს თბილისის მერიის მიერ დაზღვეული იქნება სულ 120 000 ბენეფიციარი.