გამოცდების ეროვნული ცენტრი შავი ზღვის მე-3 საგანმანათლებლო კონფერენციისთვის მონაწილეების რეგისტრაციას იწყებს. როგორც "ჯი-ეიჩ-ენს" გამოცდების ეროვნული ცენტრიდან აცნობეს, შავი ზღვის საგანმანათლებლო კონფერენცია ბათუმში 8 და 9 ივნისს გაიმართება და კონფერენციის მთავარი თემა "ახალი ტექნოლოგიები საგანმანათლებლო შეფასებაში" იქნება.
შავი ზღვის მესამე საგანმანათლებლო კონფერენციაზე მოწვეულნი არიან სტუმრები როგორც შავი ზღვის რეგიონიდან, ასევე მსოფლიოს სხვა ქვეყნებიდან.
კონფერენციის მონაწილეების რეგისტრაცია დღეიდან იწყება და მონაწილეობის მსურველებს შეუძლიათ გამოცდების ეროვნული ცენტრის ვებგვერდზე (www.naec.ge) შეავსონ სარეგისტრაციო ფორმა და გამოგზავნონ მისამართზე bsc@naec.ge.
შეგახსენებთ, რომ შავი ზღვის კონფერენციების ორგანიზება გამოცდების ეროვნულმა ცენტრმა 2006 წლიდან დაიწყო. განათლების სფეროს მკვლევრები, პრაქტიკოსი ექსპერტები და განათლების პოლიტიკის სპეციალისტები მსოფლიოს 40-ზე მეტი ქვეყნიდან 3 წელიწადში ერთხელ საქართველოში იკრიბებიან და საგანმანათლებლო სფეროში მიმდინარე უმნიშვნელოვანეს ცვლილებებს, პრობლემებსა და სიახლეებს განიხილავენ.
