"ეს იყო ძალიან მნიშვნელოვანი ახალი ამბავი. მინდა ვთქვა, რომ სულ ვმუშაობდით. დღე არ ყოფილა, რომ ამ საკითხზე არ მეფიქრა. თან, ძალიან ვნერვიულობდით, იმიტომ, რომ რამდენჯერმე მოლაპარაკებები ჩიხში შევიდა", _ აცხადებს საქართველოს პრეზიდენტი და აღნიშნავს, რომ მდგომარეობას ართულებდა ისიც, რომ მეკობრეებს თითქმის 600 მოქალაქე ჰყავთ დატყვევებული, მათ შორის ინგლისის, ევროკავშირის ქვეყნების მოქალაქეები.

"ჩვენი მეგობრებიც გვეუბნებოდნენ: დაანებეთ ამ ამბავს თავი, თქვენი მასშტაბი ვერ წვდებაო, აგერ ამხელა ქვეყნები ვერ ვაკეთებთ ვერაფერსო - ერთი წამით არ ჩამოგვიშვია ხელები და ერთი წამით არ შევგუებივართ ამ სიტუაციას. ყველანაირი განკარგულება გვქონდა მიცემული. ათასჯერ გავაგზავნეთ ხალხი. უბედურება კი ის იყო, რომ საჯაროდ ამას ვერ ვამბობდით. ამის გამო იყო ჩვენი ათასგვარი კრიტიკა და ყველაფერი და ეს გასაგები იყო იმიტომ, რომ ვერ ვამბობდით რას ვაკეთებდით - რომ გვეთქვა ყველაფერი ჩაიშლებოდა", _ განაცხადა მიხეილ სააკაშვილმა და მეზღვაურების გათავისფლების ოპერაციაში საქართველოს ეკონომიკური და მდგრადი განვითარების მინისრის მოადგილის გიორგი კარბელაშვილის წვლილზე ისაუბრა.

"ასე ძალიან დიდი მოთბენით, დელიკატურად, მართლაც ყოჩაღ გიორგი კარბელაშვილს, მართლაც ძალიან კარგად იმუშავა, ვერა ქობალიამაც, რომელიც იქ საერთაშორისო ორგანიზაციაში გავაგზავნეთ რამდენჯერმე. გვასწავლეს რაღაც გზები და კარბელაშვილმა მართლაც ნახევარი მსოფლიო მოიარა, რა ხალხზე არ გავიდა, ვის არ დაელაპარაკა, არ შესასვლელები და გამოსასვლელები არ იპოვა და ბოლოს რა თქმა უნდა გამოუვიდა", _ განაცხადა მიხეილ სააკაშვილმა და აღნიშნა, რომ ეს არის მაგალითი იმისა, რომ საქართველო შედგა როგორც სახელმწიფო და საქართველოს დასაკარგი ხალხი არ ჰყავს.

"საქართველო არის სახელმწიფო, რომელიც თითოეული მოქალაქისათვის, ადამიანისთვის და თითოეული კაცის გადარჩენისათვის იბრძოლებს ბოლომდე, იმიტომ, რომ ამაზე მაღალი ამბიცია და ამაზე მაღალი ამოცანა თუ არა თითოეული ჩვენი მოქალაქის ინტერესების დაცვა, მომავლის გადარჩენა არც ჩვენ როგორც მთავრობას და არც ჩვენ როგორც სახელმწიფოს ნამდვილად არ გაგვაჩნია", _ განაცხადა მიხეილ სააკაშვილმა.