სასწრაფო სამედიცინო ბრიგადის გამოძახების ღირებულება 40 ლარად შეფასდა. აღნიშნულთან დაკავშირებით „სადაზღვევო კომპანიების, ქალაქ თბილისის მერიის და სხვადასხვა ორგანიზაციების მიერ ქალაქ თბილისის მოსახლეობის სასწრაფო სამედიცინო დახმარების მომსახურების ასანაზღაურებელი ღირებულების განსაზღვრის შესახებ" თბილისის მთავრობის დადგენილება უკვე გამოქვეყნდა.
დადგენილების თანახმად, მოსახლეობის მიერ უფასო სასწრაფო სამედიცინო დახმარების მიღებისათვის, რაც განპირობებულია იმით, რომ ქალაქ თბილისის მერია სრულად ანაზღაურებს ქალაქის მოსახლეობისათვის სასწრაფო სამედიცინო მომსახურებას, უშუალოდ და სადაზღვევო პროგრამების მეშვეობით, საჭიროა განისაზღვროს სამედიცინო ბრიგადის გამოძახების ღირებულება.
მომსახურება კი ანაზღაურებული იქნება სსიპ „სასწრაფო სამედიცინო დახმარების ცენტრისათვის" ქ. თბილისის მერიის, ასევე სადაზღვევო კომპანიების და, ცალკეულ შემთხვევებში სხვადასხვა ორგანიზაციის მიერ.
დედაქალაქის მთავრობის დადგენილებით, ქალაქ თბილისის ადმინისტრაციულ საზღვრებში სსიპ „სასწრაფო სამედიცინო დახმარების ცენტრის" სამედიცინო ბრიგადის გამოძახების ღირებულება, რომელიც ანაზღაურდება ქალაქ თბილისის მერიის, სადაზღვევო კომპანიებისა და, ცალკეულ შემთხვევებში სხვადასხვა ორგანიზაციის მიერ, განისაზღვრება 40 ლარის ოდენობით.
