"დემოკრატიული მოძრაობის" ლიდერ ნინო ბურჯანაძის განცხადებით, აშშ-სა და ევროპაში ძალიან შეშფოთებულნი არიან იმ რეალობით, რაც საქართველოშია.
"ძალიან შეშფოთებულები არიან იმის გამო, რომ ის კურსი, რაც ხელისუფლებას აქვს, დამღუპველია. ჩვენთვის ამოცანა მარტო ის კი არ არის, რომ ვებრძოლოთ სააკაშვილს და მის ხელისუფლებას, ჩვენთვის ამოცანა არის, რომ ვებრძოლოთ იმ პრობლემებს, რომელიც მან დაამკვიდრა. მათ თუ ზუსტად იგივე პრინციპი აქვთ და ამბობენ, რომ შეუძლია ხელისუფლებასთან ითანამშრომლონ, მაშინ რა თქმა უნდა ჩვენ ვერ ვითანამშრომლებთ მათთან. ეს არ არის დასავლური ფასეულობები, ეს სიყალბეა. დასავლური ფასეულობები ჩვენი პარტიისთვისაც ისეთივე მნიშვნელოვანია, როგორც მათთვის, ვინც ამის დეკლარირებას ახდენს, მაგრამ ნაკლებად აკეთებს ამას. აღარაფერს ვამბობ იმ უმეცრებაზე, როცა პოლიტიკური პარტიები ერთმანეთს ეჯიბრებიან იმის დამტკიცებაში, თუ ვინ უფრო პროამერიკული და პროდასავლურია. ეს ანარქიზმი არის პოლიტიკაში, რადგან უნდა იყვნენ პროქართული პოლიტიკოსები", - განაცხადა ბურჯანაძემ.
მისი თქმით, ის ამაყობს იმით, რომ "დემოკრატიული მოძრაობა" არის არა პროევროპული ან პროამერიკული პარტია, არამედ პროქართული პარტია.
"მე ვამაყობ, რომ ვართ პროქართული პარტია. ჩვენი მთავარი ამოცანა, ჩვენი მთავარი მიზანი არის პროქართული ფასეულობები დემოკრატიული ღირებულებების აუცილებელი იმპლემენტაციით. ჩვენ არც პროევროპული და არც პრორუსული ძალა ვართ. ჩვენ ვართ პროქართული ძალა. სადაც ჩვენი ინტერესები დაემთხვევა ამერიკის შეერთებული შტატების ინტერესს, იქ გავითვალისწინებთ აშშ-ის ინტერესს, სადაც ჩვენი ქართული სახელმწიფოებრივი ინტერესები და საქართველოს ინტერესი დაემთხვევა ევროპის ინტერესს, იქ გავითვალისწინებთ ევროპის ინტერესს და თუ დაემთხვა საქართველოს ინტერესი რუსეთის, აზერბაიჯანის თუ ნებისმიერი სხვა სახელმწიფოს ინტერესს, ჩვენ განვახორციელებთ იმ ნაბიჯებს, რაც იქნება ჩვენი სახელმწიფოს ინტერესებში", - აღნიშნა ბურჯანაძემ.