„ქართული პარტიის" წევრების მიმართ ზეწოლა და პოლიტიკური დევნა გრძელდება. ამის შესახებ პარტია გავრცელებულ განცხადებაში იუწყება. განცხადების მიხედვით, გასული წლის დაპატიმრებების და პარტიის წევრების წინააღმდეგ განხორციელებული სხვა სადამსჯელო მოქმედებების გაგრძელებაა დღევანდელი ფაქტი.
"სააკაშვილის რეჟიმმა საშობაო სიურპრიზი გაგვიკეთა: დღეს დილით, „ქართული პარტიის"გენერალურ მდივანს ირაკლი დოლაბერიძეს, რომელიც პარტიის სხვა ლიდერებთან ერთად პარიზში, პარტიის თავმჯდომარე ირაკლი ოქრუაშვილთან პოლიტიკური კონსულტაციებისთვის მიემგზავრებოდა, თბილისის აეროპორტის სასაზღვრო პოლიციის თანამშრომლებმა გაფრენის საშუალება არ მისცეს. მიზეზი არ დაუსახელებიათ. მათ დოლაბერიძეს უთხრეს, რომ ამის გასარკვევად პოლიციის შესაბამისი დეპარტამენტისთვის წერილობით მიემართა. ირაკლი დოლაბერიძეს ხშირად უწევს საზღვარგარეთ გამგზავრება და ამჯერადაც საფრანგეთის საელჩოსგან მიღებული აქვს მრავალჯერადი სარგებლობის ვიზა", - აღნიშნულია განცხადებაში.
„ქართული პარტია" შინაგან საქმეთა სამინისტროს ქმედებას პოლიტიკურ პროვოკაციად აფასებს და მოითხოვს ძალოვანმა უწყებამ დაუყოვნებლივ გააკეთოს განმარტება აღნიშნულთან დაკავშირებით.
პარტია მიმართავს საქართველოში აკრედიტებულ დიპლომატიურ კორპუსს მომხდარ ფაქტზე გამოხატოს პოზიცია.
„ქართული პარტია" გმობს შს სამინისტროს ქმედებას და აცხადებს, რომ ეს არის ხელისუფლების მხრიდან ოპოზიციური ძალის მიმართ ზეწოლა და პოლიტიკური დევნა.
