2012 წლის 1 იანვარს შ.პ.ს `რუსთავის მედიის მართვის კომპანიის~ თანამშრომლები მიხეილ ზედგენიძე და ვალერი გიჰკაშვილი კომპანიის მითითებით კომპანიის ავტოსატრანსპორტო საშუალებით გადაადგილდებოდნენ, რა დროსაც მათ ორი ავტომანქანით თავს დაესხნენ უცნობი პირები. აღნიშნულ ავტომანქანებს არ გააჩნდათ პოლიციის ამოსაცნობი ნიშნები, ხოლო თავდამსხმელებს არ წარუდგენიათ პირადობის მოწმობები.
თავდამსხმელებმა გააჩერეს კომპანიის ავტომანქანა და მართვის კომპანიის თანამშრომლების მიმართ გამოიყენეს ფიზიკური და ფსიქოლოგიური ძალადობა. აღნიშნულის შემდეგ გადაიყვანეს ისინი სასაფლაოს მიმდებარე ტერიტორიაზე, სადაც გაგრძელდა მათზე ფიზიკური ძალადობა.
ამჟამად ჩვენი თანამშრომლები იმყოფებიან წინასწარი დაკავების საკანში. დაკავების შესახებ არავის უცნობებია კომპანიისთვის, რათა ადვოკატების დროული ჩართვით დაკავებისთანავე მომხდარიყო მათი ინტერესების დაცვა სამართლებრივი მეთოდებით.
კომპანია მომხდარს აფასებს მის წინააღმდეგ მიმართულ პროვოკაციად.

შეგახსენებთ, რომ აღნიშულ ფაქტთან დაკავშირებით შსს-მ განცხადება გაავრცელა. განცხადების მიხედვით, 2012 წლის 1 იანვარს, შინაგან საქმეთა სამინისტროს თანამშრომლების მიერ შემჩნეული იქნა, რომ ნუცუბიძის ქუჩის #93-ში მდებარე ტელეკომპანია მაესტროს ეზოდან, ავტომანქანის მეშვეობით ხდებოდა სხვადასხვა ნივთების გატანა.
როგორც საქართველოს შს სამინისტრო იტყობინება, პოლიციის თანამშრომლებმა იმ მოტივით, რომ შეიცავდა თუ არა აღნიშნული ქმედება დანაშაულის ნიშნებს სცადეს ავტომანქანის გაჩერება და გადამოწმება, რა დროსაც ავტომანქანის მძღოლი არ დაემორჩილა პოლიციის თანამშრომლების მოთხოვნას და გაქცევის მიზნით მოახდინა პოლიციის ავტომანქანაზე შეჯახება.
აღნიშნული ავტომანქანა დაკავებული იქნა პოლიციის მიერ. საქმეზე ქ.თბილისის მთავარ სამმართველოში აღძრულია სისხლის სამართლის საქმე.