მაიას ტომის უხუცესები, რომლებიც გვატემალაში ცხოვრობენ, დარწმუნებულნი არიან, რომ სამყაროს დასასრული, რომლის პროგნოზსაც მათი წინაპრები 2012 წლისთვის აკეთებნენ, არ დადგება.
ერთ-ერთი ბელადის, ალპოლინარიო ჩილე პიკსტუნის განმარტებით, გავრცელებული შეცდომის მიუხედავად, მაიას კალენდარი არაფერს ამბობს პლანეტის დაღუპვის შესახებ.
"სამყაროს დასასრული დასავლეთის მითია", _ განაცხადა ბელადმა.
მისი თქმით, ეს პროგნოზი მხოლოდ იმას ნიშნავს, რომ სრულდება გარკვეული პერიოდი.
მაიას უძველესი კალენდრის მიხედვით, რომელიც ეპოქას დაახლოებით 394 წლით საზღვრავდა და რომელიც ცნობილია ბაკტუნის სახელწოდებით, 13 ბაკტუნის დასასრული 2012 წლის 21 დეკემბერს დადგება.
"13" ინდიელების ამ ტომისთვის ღვთიური რიცხვია. კალენდარი აჩვენებს, რომ ამ დროს "მთავრდება დრო".
ეროზიისა და გაბზარვის გამო ტექსტის ბოლო ნაწილი წაკითხვას, ფაქტობრივად, არ ექვემდებარება.
ერთ-ერთმა არქეოლოგმა ივარაუდა, რომ იქ წერია "ბოლონ იოკტე" _ "ჩამოვა ციდან".
შეგახსენებთ, რომ მრავალმა ადამიანმა 2012 წელი უკვე დაუკავშირა ასტრონომიული ამბების სერიას, რომელიც ამ წელს უნდა მოხდეს.
ისინი ვარაუდობენ, რომ 21.12.12 11:11 საათზე მზის ენერგიის დინება დედამიწისკენ "აუცილებლად დაირღვევა".
