ახალი წლის პირველი დღე ბათუმის ბავშვთა სახლების აღსაზრდელებს ტრადიციულად აჭარის მთავრობის თავმჯდომარემ ლევან ვარშალომიძემ და ქალაქის მერმა რობერტ ჩხაიძემ მიულოცეს.
აჭარის მთავრობისა და მერიის წარმომადგენლებმა მახინჯაურის ჩვილ ბავშვთა და ურეხის მზრუნველობამოკლებული სახლის აღსაზრდელებს ტკბილეული, სათამაშოები და საყოფაცხოვრებო ტექნიკა მიუტანეს. პატარების განწყობაზე მოძრავმა თეატრმა "ბერიკებმა" იზრუნეს.
"მერვე წელია ბავშთა სახლებში მივდივართ და ახალი წლის სიხარულს მათთან ერთად ვიზიარებთ. ამ პატარებს განსაკუთრებული ყურადღება და სითბო სჭირდებათ, ჩვენც მაქსიმალურად გვერდით ვუდგავართ მათ. სამ თვეში ორივე სახლის რეაბილიტაცია დასრულდება და ბავშვებს ცხოვრებისთვის უკეთესი პირობები ექნებათ", - განაცხადა ლევან ვარშალომიძემ.
დღესვე მთავრობის თავმჯდომარემ და ბათუმის მერმა სოციალურად დაუცველი ოჯახი მოინახულეს. ბაგრატიონის N35-ში მცხოვრებმა ჯაჯანიძეების 7-სულიანმა ოჯახმა მათგან საჩუქრები მიიღეს.
