მომავალი წლიდან ახალი თანამდებობა - პერსონალურ მონაცემთა დაცვის ინსპექტორი შემოდის. აღნიშნულთან დაკავშირებით პარლამენტმა მესამე მოსმენით "პერსონალურ მონაცემთა დაცვის" შესახებ კანონი უკვე დაამტკიცა, რომელიც ძალაში 2012 წლის 1 მაისიდან შევა.
მიღებული გადაწყვეტილების თანახმად, ინსპექტორის ძირითადი ამოცანები იქნება კონსულტაციის გაწევა საჯარო და კერძო დაწესებულებებისთვის პერსონალურ მონაცემთა დაცვასთან დაკავშირებულ საკითხებზე; მონაცემთა დაცვასთან დაკავშირებული განცხადებებისა და საჩივრების განხილვა; მონაცემთა დამუშავების კანონიერების შემოწმება, როგორც საჯარო, ისე კერძო დაწესებულებებში; საზოგადოების ინფორმირება საქართველოში პერსონალურ მონაცემთა დაცვის მდგომარეობისა და მასთან დაკავშირებული მნიშვნელოვანი მოვლენების შესახებ.
პერსონალურ მონაცემთა დაცვის ინსპექტორი თანამდებობაზე ღია კონკურსის წესით უნდა დაინიშნოს, ხოლო კომისიას პრემიერ-მინისტრი დაამტკიცებს. შესარჩევი კონკურსის შემადგენლობაში შევლენ მთავრობის, პარლამენტის, სასამართლო ხელისუფლებისა და სახალხო დამცველის აპარატის, აგრეთვე არასამთავრობო სექტორის წარმომადგენლები.
ინსპექტორი სამი წლის ვადით დაინიშნება და ერთი და იგივე ინსპექტორი თანამდებობაზე შეიძლებება დაინიშნოს ზედიზედ მხოლოდ ორჯერ.
ინსპექტორი დამოუკიდებელი უნდა იყოს და არ უნდა დაექვემდებაროს არცერთ თანამდებობის პირს თუ რაიმე ორგანოს და ამას უფლება ექნება, რომ არ მისცეს ჩვენება იმ ფაქტის გამო, რომელიც მას გაანდეს, როგორც ინსპექტორს და ეს უფლება შეუნარჩუნდება უფლებამოსილების შეწყვეტის შემდეგაც.
ინსპექტორის საქმიანობისა და მის მიერ უფლებამოსილებათა განხორციელების წესი, მთავრობის მიერ დამტკიცებული დებულებით განისაზღვრება.