საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ, 28 დეკემბერის სხდომაზე, სს „თელასი" ლიცენზიის პირობების დარღვევის გამო, სახელმწიფო ბიუჯეტის სასარგებლოდ, 15 000 ლარით დააჯარიმა.
კომისიის მიერ მიღებული გადაწყვეტილების მიხედვით, სს „თელასმა" დღემდე არ მოახდინა ქ. თბილისში, ჭავჭავაძის #37 მცხოვრები 22 ოჯახის ინდივიდუალური გამრიცხველიანება. მათ მინიჭებული არ აქვთ აბონენტის ნომერი, არ გააჩნიათ ინდივიდუალური აღრიცხვის კვანძი და გახარჯული ელექტროენერგიის აღრიცხვა ხდება საერთო მრიცხველით. იქიდან გამომდინარე, რომ სს „თელასი" უკვე დაჯარიმებული იყო იგივე სახის სალიცენზიო პირობების დარღვევის გამო, მას დაეკისრა „ლიცენზიისა და ნებართვების შესახებ" საქართველოს კანონით გათვალისწინებული ჯარიმის სამმაგი ოდენობა.
მიმდინარე წლის ბოლო სხდომაზე, კომისიამ შპს „ბათუმის წყალზე" წყალმომარაგების ლიცენზია გასცა. ასევე, განიხილა დავა შპს „ეიჯი ინვესტ"-სა და სს „კახეთის" ენერგოდისტრიბუციას" შორის და ის შპს „ეიჯი ინვესტ"-ს სასარგებლოდ გადაწყვიტა.
კომისიის გადაწყვეტილებით, ცვლილებები შევიდა „სასმელი წყლის მიწოდებისა და მოხმარების წესებში", „ელეტროენერგიის მიწოდებისა და მოხმარების წესებში", ასევე, ცვლილებებია „სასმელი წყლის მომხმარებლისათვის წარსადგენ ქვითარზე დასატანი დამატებითი ინფორმაციის განსაზღვრის შესახებ" კომისიის გადაწყვეტილებაში. აღნიშნული ითვალისწინებს, მომხმარებლების ინფორმირების მიზნით, „სასმელი წყლის მიწოდებისა და მოხმარების წესებით" გათვალისწინებული ინფორმაციის ქვითარზე ასახვას.
