კონფლიქტების მოგვარების საკითხებზე მომუშავე თემატურ ჯგუფს გიორგი ვოლსკი, ზურაბ ბედიანაშვილი, პაატა ზაქარეიშვილი, ლევან ლორთქიფანიძე, გიორგი ჩიქოვანი, გიორგი ხუციშვილი უხელმძღვანელებენ.

ვოლსკის თქმით, ჯგუფის ამოცანაა, კონსულტაციები აწარმოოს საექსპერტო წრეებთან, საერთაშორისო ორგანიზაციებთან, სხვადასხვა ქვეყნის წარმომადგენლებთან, კონფლიქტების მოგვარების საკითხთა სფეროში არსებული ინტელექტუალური რესურსი შეისწავლოს და ახალი მიდგომები ეძიოს. მისი განმარტებით, ჯგუფი თავისი საქმიანობის დღის წესრიგს საზოგადოებისგან წამოსული თხოვნების გათვალისწინებით ჩამოაყალიბებს და იმუშავებს, რათა ამ თემების განხილვაში რაც შეიძლება, ფართო ფენების ჩართულობა უზრუნველყოს.

"გვინდა, ქართულ საზოგადოებას, მათ შორის დევნილებს და საერთაშორისო თანამეგობრობას, კონფლიქტების მოგვარების პერსპექტივებთან დაკავშირებით სახალხოექსპერტიზაგავლილი კონცეფცია წარვუდგინოთ, რომელიც საფუძვლად დაედება ამ მიმართულებით ჩვენი მოძრაობის პროგრამას. ჩვენი მოსაზრებები აფხაზურ და ოსურ საზოგადოებებს უნდა მივაწვდინოთ", - განაცხადა ვოლსკიმ.

მისი თქმით, კონცეფცია ორიენტირებული უნდა იყოს საქართველოს დასავლელი პარტნიორების - აშშ-ის, ევროკავშირის, ნატო-ს ოფიციალური მოწოდებების რეალიზაციის შესაძლებლობაზე და სამშვიდობო პროცესის აღდგენის, დეოკუპაციისა და ტერიტორიული მთლიანობის უზრუნველყოფის მიზნით მათი რესურსების ეფექტურად გამოყენებაზე.