ტელეკომპანია „იმედის" ჟურნალისტი ნოდარ მელაძე 2011 წლის ჟურნალისტად დასახელდა და საპატიო ჯილდო „ოქროს პერგამენტი" გადაეცა.
ნოდარ მელაძეს „ოქროს პერგამენტი" წლის ადამიანებისა და კომპანიების დაჯილდოების ცერემონიალზე გადაეცა, რომელსაც კომპანია ბაგრატიონი 1882-ის დარბაზი მასპინძლობდა.
ნომინაციაში წლის ჟურნალისტი ნოდარ მელაძესთან ერთად დასახელებულნი იყვნენ: ეკა ბერიძე, პაატა იაკობაშვილი, ეკა კვესიტაძე, დავით პაიჭაძე, ეკა ხოფერია, ელისო ჩაფიძე.
შეგახსენებთ, რომ „ოქროს პერგამენტის" დაჯილდოების ცერემინილი ყოველი წლის 24 დეკემბერს იმართება და მას კომპანია ბაგრატიონი 1882-ის დარბაზი მასპინძლობს.
2011 წელს გამარჯვებულები 11 ნომინაციაში გამოვლინდნენ, ასევე გაიცა საპატიო „ოქროს პერგამენტიც". გამარჯვებულების გამოსავლენად გამოკითხვა მთელი საქართველოს მასშტაბით ჩატარდა და მასში მონაწილეობა 2986-მა რესპოდენტმა მიიღო.
საკონსულტაციო ჯგუფი GCG-ის მიერ ჩატარებულ კვლევაში რესპოდენტების რაოდენობა შემდეგნაირად გადანაწილდა: თბილისი - 42%, კახეთი - 9%, ქვემო ქართლი - 7%, შიდა ქართლი - 6%, იმერეთი - 10%, სამეგრელო - 10%, გურია - 3%, მცხეთა მთიანეთი - 3%, აჭარა - 10%.
რაც შეეხება გამოკითხულთა სოციალურ მდგომარეობას, აქ სტატისტიკა ასე გამოიყურება: სტუდენტი - 10%, დასაქმებული - 29%, თვითდასაქმებული - 23%, უმუშევარი - 24%, პენსიონერი - 14%.
გამოკითხულთა შორის 53% ქალია, ხოლო 47% მამაკაცი.
წელს „ოქროს პერგამენტის" დაჯილდოების ცერემონიალის სპონსორები იყვნენ კომპანიები ავერსი, გუდვილი, ნატალი და ფლაუერსი.