"მადლობას ვუხდით სახალხო დამცველს იმ დახმარებისთვის, რომელიც სახალხო დამცველის ოფისმა გასწია 26 მაისის დილას და მის შემდგომ, "სახალხო კრების" დაკავებულ მომხრეთათვის. სახალხო დამცველის ანგარიშში ხაზგასმითაა აღნიშნული,რომ ადვოკატებმა ვერ შეძლეს დაკავებულების მონახულება, ვერ გამოიყენეს ადმინისტრაციული პატიმრობის გასაჩივრების კანონით დადგენილი საშუალება 48-საათიანი ვადის გასვლის გამო, ხოლო მათი ოჯახის წევრები მოკლებულნი იყვნენ ელემენტარულ შესაძლებლობას, სცოდნოდათ, სად იმყოფებოდნენ მათი ახლობლები", - აღნიშნულია "სახალხო კრების" განცხადებაში.

განცხადების თანახმად, სახალხო დამცველის ანგარიში კიდევ ერთი დასტურია იმისა, რომ 26 მაისს ხელისუფლების მიერ, მშვიდობიანი მომიტინგეების მიმართ მოწყობილი იყო საჩვენებელი სადამსჯელო სპეცოპერაცია და მას არავითარი საერთო არ ჰქონდა მიტინგის დაშლასთან.

"სახალხო კრება" მიმართავს საერთაშორისო საზოგადოებას, საქართველოში აკრედიტებულ დიპლომატიურ კორპუსს, არასამთავრომო და საერთაშორისო ორგანიზაციებს და კიდევ ერთხელ მოითხოვს მაისის მოვლენების ობიექტურ გამოძიებას.

სახალხო დამცველის ანგარიშის მიხედვით, 26 მაისს დაკავებულთა დაცვის უფლებები დაირღვა. როგორც ანგარიშშია ნათქვამი, ადვოკატებმა ვერ შეძლეს დაკავებულთა მონახულება, ვერ გამოიყენეს ადმინისტრაციული პატიმრობის გასაჩივრების კანონით დადგენილი საშუალება 48-საათიანი ვადის გასვლის გამო და დაკავებულთა ოჯახის წევრები მოკლებულნი იყვნენ ელემენტარულ შესაძლებლობას, სცოდნოდათ, სად იმყოფებდნენ მათი ახლობლები.