21 დეკემბერს, 16:00 საათზე, "საქართველოს სოს ბავშვთა სოფელი" ოჯახის გაძლიერების პროგრამის ფარგლებში საშობაო საქველმოქმედო გამოფენა-გაყიდვას აწყობს. პროგრამის მონაწილე ბავშვები ნამუშევრებს კავკასიურ სახლში გამოფენენ. თანხა სრულად გადაეცემათ გამოფენილი ნამუშევრების ავტორებს.
ოჯახის გაძლიერების პროგრამის მიზანია, დაეხმაროს სოციალურად დაუცველ ოჯახებს, რათა ბავშვების აღზრდა-განვითარება უსაფრთხო და მზრუნველ ოჯახურ გარემოში მოხდეს. ოჯახის გაძლიერების პროგრამა ფუნქციონირებს თბილისსა და ქუთაისში. მიზნობრივ ჯგუფში შედიან 0-18 წლამდე ასაკის ბავშვები და მათი მშობლები, რომლებიც სხვადასხვა სოციალური ფაქტორის გამო, საჭიროებენ მხარდაჭერასა და დახმარებას. პროგრამის ერთ-ერთი ძირითადი მიმართულება პროგრამაში ჩართული ბენეფიციარების დასაქმებაა. ინდივიდუალური მიდგომის საფუძველზე, ხდება მშობელთა კვალიფიკაციის ამაღლება. 2011 წლის განმავლობაში პროექტის დახმარებით 45-მა სოციალურად დაუცველმა პირმა შეძლო საკუთარი რესურსის რეალიზება დასაქმებისა თუ თვითდასაქმების გზით.
დასაქმების სერვისის მნიშვნელოვან მიმართულებას წარმოადგენს ხელოვნების ნიჭით დაჯილდოებულ ბენეფიციართა მხარდაჭერა მინანქრის, თექის, მოდელირების შესწავლაში. საბოლოო შედეგის მისაღწევად პროექტი ეხმარება მათ შექმნილი პროდუქციის რეალიზაციასა და სხვადასხვა კულტურული ღონისძიების ორგანიზებაშიც. ამ მიმართულებით პროგრამაში ჩართულია 51 დედა და 69 ბავშვი. სწორედ მათი ნამუშევრები გაიყიდება გამოფენაზე. გამოფენაზე წარმოდგენილი იქნება ბავშვების მიერ თერაპიის პროცესში შექმნილი ნამუშევრები (ნახატები, ცვილი, თიხა, თაბაშირი). აგრეთვე, მშობელთა და მოზარდთა ხელნაკეთი პროდუქცია (თექა, მინანქარი, სხვა საიუველირო ნაწარმი).
ღონისძიების მიზანია ბავშვებისთვის მოტივაციის ამაღლება სოციალური ფუნქციონირების გაზრდის მიზნით, ასევე ხელნაკეთი ნამუშევრების პოპულარიზაცია, საზოგადოებისთვის გაცნობა და რეალიზაცია.
